जळगाव : गुढीपाडव्या सारख्या सणाच्या आनंदावर पाणी फेरणारी धक्कादायक घटना तालुक्यातील निमखेडी येथे उघडकीस आली आहे. कौटुंबिक वादातून संतापलेल्या पतीने पत्नीवर लोखंडी विळ्याने वार करत तिची निर्घृण हत्या केल्याची घटना शुक्रवारी (१९ मार्च) दुपारी घडली. या घटनेमुळे परिसरात भीतीचे आणि संतापाचे वातावरण निर्माण झाले आहे.
दिपाली नितीन सोनवणे (वय २८) असे मृत महिलेचे नाव असून, आरोपी पती नितीन विजय सोनवणे यानेच हा भयंकर प्रकार केल्याचे समोर आले आहे. काही दिवसांपासून सुरू असलेल्या कौटुंबिक वादातून ही घटना घडल्याची प्राथमिक माहिती आहे.
शुक्रवारी दुपारी पती-पत्नीमध्ये पुन्हा वाद झाला. वाद विकोपाला गेल्यानंतर संतापाच्या भरात नितीन सोनवणे याने घरातील लोखंडी विळा घेऊन पत्नीच्या मानेवर व पोटावर सपासप वार केले. या हल्ल्यात दिपाली सोनवणे यांचा जागीच मृत्यू झाला. सणाच्या दिवशी घरातच घडलेल्या या रक्तरंजित घटनेमुळे गावात एकच खळबळ उडाली.
घटनेनंतर आरोपी स्वतःहून जळगाव तालुका पोलीस ठाण्यात हजर झाला. पोलिसांनी तात्काळ घटनास्थळी पोहोचून पंचनामा केला असून मृतदेह शवविच्छेदनासाठी शासकीय वैद्यकीय महाविद्यालयात पाठवण्यात आला आहे. या प्रकरणी गुन्हा दाखल करण्याची प्रक्रिया सुरू असून पुढील तपास पोलीस करत आहेत.
मृत दिपाली यांच्या पश्चात दोन मुलं व एक मुलगी असा परिवार असून, या घटनेमुळे निमखेडी गावावर शोककळा पसरली आहे.
Discussion about this post