जळगाव :फेब्रुवारी संपत असतानाच जळगाव जिल्ह्यात उन्हाचा कडाका वाढू लागला असून कमाल तापमानाने ३५ अंशांचा टप्पा ओलांडला आहे. गुरुवारी जिल्ह्याचा कमाल पारा ३५.८ अंश सेल्सिअसवर पोहोचल्याची नोंद झाली. त्यामुळे दुपारच्या सुमारास उकाड्यात लक्षणीय वाढ झाली असून नागरिकांना तीव्र उन्हाचा सामना करावा लागत आहे.
हवामान विभागाच्या आकडेवारीनुसार किमान तापमान १८.३ अंश सेल्सिअस इतके नोंदवले गेले. सकाळचा हलका गारवा कमी होत चालला असून दुपारच्या वेळेत रस्त्यांवर वर्दळ घटल्याचे चित्र दिसून येत आहे. बाजारपेठा आणि सार्वजनिक ठिकाणी दुपारी तुलनेने कमी हालचाल जाणवत आहे.
तज्ज्ञांच्या मते, फेब्रुवारीअखेरच तापमानात झालेली ही वाढ लक्षात घेता मार्च आणि एप्रिल महिन्यांत पारा ४५ अंशांच्या पुढे जाण्याची शक्यता नाकारता येत नाही. त्यामुळे यंदाचा उन्हाळा अधिक तीव्र ठरण्याची शक्यता व्यक्त केली जात आहे.
दरम्यान, वाढत्या तापमानाच्या पार्श्वभूमीवर आरोग्य विभागाने नागरिकांना सतर्कतेचा इशारा दिला आहे. भरपूर पाणी पिणे, दुपारच्या कडक उन्हात शक्यतो बाहेर न पडणे, बाहेर जाताना डोक्यावर टोपी किंवा कापडाचा वापर करणे, तसेच लहान मुले आणि ज्येष्ठ नागरिकांची विशेष काळजी घेणे, असे आवाहन करण्यात आले आहे.
आगामी काही दिवसांत तापमानात आणखी वाढ होण्याची शक्यता हवामान खात्याकडून वर्तवण्यात आली असून प्रशासन परिस्थितीवर लक्ष ठेवून आहे.
Discussion about this post