मुंबई । राज्यात नगरपरिषद आणि नगरपालिका निवडणुकीची रणधुमाळी सुरु असून नगराध्यक्ष पदासाठी उभ्या असलेल्या उमेदवारांच्या प्रचारासाठी सर्वच पक्षातील नेते प्रचार सभा घेत असून याच दरम्यान पाणी पुरवठा व स्वच्छता मंत्री गुलाबराव पाटील यांच्या ‘लक्ष्मी’बाबतच्या वक्तव्यावरून मोठा वाद निर्माण झाला होता. “एक तारखेला घराबाहेर खाटा टाकून झोपा, कारण लक्ष्मी येणार आहे, असं मंत्री गुलाबराव पाटील यांनी म्हटलं होते.
गुलाबराव पाटील यांच्या या वक्तव्यावर जनता व विरोधी पक्षांनी टीका केल्यानंतर त्यांनी यावर स्पष्टीकरण दिलं. यावेळी ते म्हणाले, “लक्ष्मीचा अर्थ फक्त नोटा होत नाही, तर लक्ष्मी आपल्या आई बहिणीचंही नाव असतं.” यावर विरोधकांनी प्रश्न उपस्थित केला आहे की गुलाबरावांना ‘लक्ष्मी’चा संदर्भ आई-बहिणींच्या रूपाने द्यायचा होता, तर “घराबाहेर खाटा टाकण्याचं” वक्तव्य कशासाठी होतं? त्यांच्या मूळ वक्तव्याचा आणि नंतर दिलेल्या स्पष्टीकरणाचा संबंध लागत नाही.
दरम्यान, राष्ट्रवादी काँग्रेस पार्टी शरदचंद्र पवार पक्षाचे आमदार रोहित पवार यांनी गुलाबराव पाटील यांच्या दोन्ही वक्तव्यांचा संदर्भ देत गुलाबरावांवर टीका केली आहे. त्यांनी यासंदर्भात एक्स या मायक्रोब्लॉगिंग प्लॅटफॉर्मवर एक पोस्ट केली आहे.
रोहित पवार म्हणाले, “नखापासून केसापर्यंत सत्तेची नशा अंगी भिनलेला माणूस कसा बेभान होतो हे गुलाबराव पाटलांमध्ये दिसतं. ‘रात्री लक्ष्मी येणार, बाहेर खाट टाकून झोपा’ म्हणणारे गुलाबराव आता हे आईबहिणींच्या बाबतीत बोलल्याचं निर्लज्जपणे सांगतायत. राजकीय जन्म दिलेल्या पक्षाचं भान राहीलं नाही तरी किमान आया-बहिणींच्या नात्याचं तरी भान ठेवा. राजकीय स्वार्थासाठी अजून किती खालची पातळी गाठणार? महाराष्ट्रात असं राजकारण योग्य नाही!
Discussion about this post