राज्यात अपघाताच्या घटनांमध्ये दिवसेंदिवस वाढ होत असून अशातच राष्ट्रवादी काँग्रेसच्या बड्या नेत्याचा अपघातात मृत्यू झाल्याची घटना समोर आलीय. अकोल्यातील मूर्तिजापूर मतदारसंघाचे राष्ट्रवादी काँग्रेसचे माजी आमदार तुकाराम बिरकड यांचा अकोला ते मूर्तिजापूर राष्ट्रीय महामार्गावर भीषण अपघात झाला. या अपघातात त्यांचा दुर्दैवी मृत्यू झाला. त्यांच्या अपघाती निधनाची बातमी कळताच राजकीय क्षेत्रात शोककळा पसरली.
अकोला शहरात अमरावती विभागातील नेत्यांची आणि कार्यकर्त्यांची बैठक होती. या बैठकीला महसूल मंत्री चंद्रशेखर बावनकुळेसह कामगार मंत्री आकाश फुंडकर, आदिवासी विकास मंत्री अशोक उईके उपस्थित होते. तुकाराम बिरकड हे चंद्रशेखर बावनकुळे यांच्या भेटीसाठी गेले होते. भेटीनंतर मोटारसायकलवर परतत असताना, जनावरे वाहून नेणाऱ्या मालवाहू वाहनाने त्यांच्या मोटरसायकलला जबर धडक दिली. या अपघातात बिरकड यांच्यासह त्यांचे सहकारी यांचा सुद्धा मृत्यू झाला.
अपघातानंतर त्यांना तातडीने स्थानिक खासगी रुग्णालयात दाखल करण्यात आले. गुरांची वाहतूक करणाऱ्या या मालवाहू वाहनाचा काही पोलिस पाठलाग करत होते. त्यामुळे वाहनचालकाने वेगाने वाहन पुढे नेण्याचा प्रयत्न केला आणि त्यातच हा अपघात घडला. दोन दिवसांनी ते सहपरिवार महाकुंभ मेळ्यात जाणार होते. मात्र, आधीच काळाने त्यांच्यावर घाला घातला.
Discussion about this post