मुंबई । महाराष्ट्रातील विधानसभा निवडणुकीत महायुतीला बहुमत मिळालं असून लवकरच नवे सरकार स्थापन होणार आहे. मात्र त्यापूर्वी महायुतीमध्ये मुख्यमंत्री पदावरून रस्सीखेस सुरु असून मुख्यमंत्री पदाची माळ कोणाच्या गळ्यात पडेल याकडे सगळ्यांचं लक्ष लागले आहे. यातच अखेर महाराष्ट्राच्या मुख्यमंत्री पदाच्या नावावर शिक्कामोर्तब झाले आहे.
मुख्यमंत्री पदासाठी पंतप्रधान नरेंद्र मोदी यांनी देवेंद्र फडणवीस यांच्या नावाला पसंती दिल्याची माहिती भाजपच्या वरिष्ठ नेत्यांनी एका वृत्तवाहिनीला दिली आहे. राष्ट्रीय स्वयंसेवक संघासोबतच पंतप्रधानांचीही फडणवीस यांच्या नावाला पसंती असून शुक्रवारी अधिकृत घोषणा होण्याची शक्यता आहे.
राज्याच्या मुख्यमंत्रिपदी कोणाची नियुक्ती होईल, याबाबतचा पेच निकालानंतर चौथ्या दिवशीही कायम असून, याबाबत भाजप हायकमांडने काहीही निर्णय अद्याप घेतला नसल्याचे कळते. एकनाथ शिंदे हे आता राजीनाम्यानंतर काळजीवाहू मुख्यमंत्री झाले आहेत. नव्या सरकारच्या प्रतीक्षेत राज्यातील जनता, सत्ताधारी पक्षाचे नेते व कार्यकर्ते आहेत. भाजप मुख्यमंत्रिपदावर ठाम असून, २ डिसेंबरपूर्वी राज्यात नव्या सरकारचा शपथविधी होण्याची चिन्हे नसल्यामुळे मुंबईत आलेले सत्तारूढ पक्षाचे आमदार आता आपापल्या मतदारसंघांत परतू लागले आहेत. दरम्यान मुख्यमंत्री पदासाठी नरेंद्र मोदी यांची देवेंद्र फडणवीस यांच्या नावाला पसंती असल्याचे भाजपच्या वरिष्ठ नेत्यांनी सांगितले आहे.
Discussion about this post