दोन वर्षात ६०० निर्णय घेतले, पण … मुख्यमंत्री एकनाथ शिंदेंच्या भाषणाची जोरदार चर्चा!

आळंदी येथे आज वारकरी संप्रदायातील मानबिंदू शांतीब्रह्म ह. भ. प. मारोती महाराज कुरेकर बाबा यांच्या 93 व्या अभिष्टचिंतन सोहळ्यानिमित्त कार्यक्रमाला मुख्यमंत्री एकनाथ शिंदे यांनी हजेरी लावली असून यावेळी बोलताना जोरदार फटकेबाजी करत विरोधकांवर निशाणा साधला. दोन वर्षात आम्ही ६०० निर्णय घेतले, अनेक निर्णय माझ्या लाडकी बहीण योजने खाले दबून गेले अशी टीका मुख्यमंत्री यांनी केली.

“महाराष्ट्र ही संतांची भूमी. कु-हेकर बाबा आणि ढोक महाराजांचे अभिनंदन. यायला उशीर झाला त्याबद्दल त्यासाठी दिलगिरी व्यक्त करतो. आजचा कार्यक्रम आयुष्यातला सगळ्यात आनंद देणारा आहे. संताचे पूजन यापेक्षा दुसरं भाग्य काय असतं. राजकीय अधिष्ठानापेक्षा संतांचे अधिष्ठान मोठे आहे. ते समाज घडवण्याचे काम करतात. धर्मवीर आनंद दिघेही प्रत्येक हरिनाम सप्त्याला न चुकता जायचे,” अशी आठवण यावेळी मुख्यमंत्री एकनाथ शिंदे यांनी सांगितली.

विरोधकांवर निशाणा..
“आम्ही आजपर्यंत ६०० निर्णय घेतले, अनेक निर्णय माझ्या लाडकी बहीण योजने खाले दबून गेले. मुख्यमंत्री माझी लाडकी बहीण योजना आम्ही सुरु केली. एखादी योजना लगेच सुरू करता येत नाही त्यासाठी बरीच मेहनत घ्यावी लागते. मी सामान्य घरातला मुलगा आहे. आईची काटकसर बघितलेला मुलगा आहे. काही लोक १५०० रुपयात विकत घेता का? लाच घेता का? असं म्हणतात. पण सोन्याचा चमचा तोंडात घेऊन येणाऱ्यांना 1500 ची काय किंमत,” असे म्हणत मुख्यमंत्र्यांनी विरोधकांवर निशाणा साधला.