जळगाव । कंपनीत नाईट शिफ्ट करून कामावरून घरी आल्यानंतर कोणत्यातरी नैराश्यातून तरुणाने साडीने गळफास घेऊन आत्महत्या केली. ही घटना आज मंगळवारी सकाळी तालुक्यातील शिरसोली येथून उघडकीस आली. समाधान बंडू कोळी (वय ४०, रा. जळके रोड, शिरसोली ता. जळगाव) असे मयत तरुणाचे नाव असून या घटनेने परिसरात खळबळ उडाली आहे. दरम्यान, याबाबत एमआयडीसी पोलीस स्टेशनला अकस्मात मृत्यूची नोंद करण्याचे काम सुरू होते.
याबाबत असे की, समाधान बंडू कोळी हा गेल्या एक वर्षापासून पत्नी, दोन मुले यांच्यासह शिरसोली येथे राहत होता. एका खाजगी कंपनीत काम करून तो परिवाराचा उदरनिर्वाह करीत होता. मंगळवारी दि. २६ मार्च रोजी सकाळी तो कंपनीतील कामावरून घरी आला. यानंतर दरवाजा बंद करून त्याने कुठल्यातरी नैराश्याखाली येऊन साडीने छताला गळफास लावून आत्महत्या केली.
दरम्यान घटनेची माहिती कळताच पत्नीने आक्रोश केला. आजूबाजूच्या नागरिकांनी त्याला शासकीय वैद्यकीय महाविद्यालय व रुग्णालयात दाखल केले असता त्याला मृत घोषित करण्यात आले. याप्रकरणी एमआयडीसी पोलीस स्टेशनला अकस्मात मृत्यूची नोंद करण्याचे काम सुरू होते.
Discussion about this post