जळगाव : भाजपने रावेर लोकसभा मतदार संघात विद्यामान खासदार रक्षा खडसे यांना तिसऱ्यांदा उमेदवारी दिली. त्याचवेळी महाविकास आघाडीत ही जागा राष्ट्रवादी शरद पवार गटाकडे जाणार असून या जागेसाठी एकनाथ खडसे किंवा त्यांची मुलगी रोहिणी खडसे यांच्या नावाची चर्चा होती. परंतु सासरा विरुद्ध सून किंवा नणंद-भावजय लढत होणार नसल्याचे एकनाथ खडसे यांनी स्पष्ट केलं.
दरम्यान,माझी सून रक्षा खडसे हिला भाजपने उमेदवारी दिली असली तरी रावेर लोकसभा मतदार संघात शेवटच्या क्षणापर्यंत तुतारीच कशी विजय होईल यासाठी आम्ही प्रयत्न करणार आहोत, असे एकनाथ खडसे यांनी म्हटले आहे. रावेर लोकसभा मतदार संघातून उमेदवारीस नकार दिल्याने होत असलेल्या आरोपांवर उत्तर देताना एकनाथ खडसे यांनी स्पष्टीकरण दिले.
गिरीश महाजनांवर टीका :
जळगाव जिल्ह्यात भाजपला कुत्र विचारात नव्हतं त्या काळात मी एकटा लढलो. संघर्ष केला आणि भाजप वाढवली, असा टोला एकनाथ खडसे यांनी मंत्री गिरीश महाजन यांना नाव न घेता लगावला. मी संघर्ष करताना कधी खचलेलो नाही. कधी पळालो नाही. कधी विकलो नाही. सत्तेसाठी या ठिकाणाहून त्या ठिकाणी गेलो नाही. लाचार होवून कधी पाया पडलो नाही, असे वक्तव्य राष्ट्रवादी काँग्रेस शरद पवार गटाचे आमदार एकनाथ खडसे यांनी केले आहे.
छळ झाला…सगळं झालं मात्र मी ठाम राहिलो. माझा पक्ष आणि मी आहे तुम्हाला काय करायचे ते करा, अशी आपली भूमिका राहिली. मी माझ्या मर्जीचा मालक आहे. मला कोणी सांगण्याची गरज नाही. रक्षा खडसे जरी उमेदवार दिली तरी रावेर मतदार संघात राष्ट्रवादी काँग्रेसची तुतारीच वाजवणार आहे.
Discussion about this post