सरकारच्या ‘या’ योजनेत 2 महिन्यांत 5 लाख महिलांनी पैसे गुंतवले, मिळतोय जबरदस्त फायदा

नवी दिल्ली : महिला सन्मान बचत प्रमाणपत्र योजना, 1 एप्रिल 2023 पासून महिलांसाठी सुरू करण्यात आलेली विशेष बचत योजनेला महिलांकडून प्रतिसाद मिळत आहे. सुरू झाल्यापासून दोन महिन्यांत 5 लाख महिलांनी या योजनेत पैसे गुंतवले आहेत. मे अखेरपर्यंत या योजनेत एकूण 3,636 कोटी रुपयांची गुंतवणूक झाली होती. याचा अर्थ महिला गुंतवणूकदारांनी यामध्ये सरासरी 73,000 रुपयांहून अधिक गुंतवणूक केली आहे. या योजनेत गुंतवणुकीची कमाल मर्यादा दोन लाख रुपये आहे. महिला सन्मान बचत प्रमाणपत्र योजनेचे (MSSC) खाते सध्या पोस्ट ऑफिसमध्येच उघडले जात आहे. आगामी काळात बँकांमध्येही खाती उघडली जातील.

दोन वर्षांच्या कालावधीची ही योजना अर्थमंत्री निर्मला सीतारामन यांनी अर्थसंकल्पात जाहीर केली होती. महिला सन्मान बचत प्रमाणपत्रामध्ये गुंतवणुकीसाठी ७.५ टक्के वार्षिक व्याज (MSSC व्याज दर) प्राप्त होत आहे. गुंतवणुकीवर टीडीएस कापला जात नाही, परंतु गुंतवणूकदाराला मिळालेल्या व्याजावर कर स्लॅबनुसार कर आकारला जाईल. या योजनेत मार्च २०२३ पर्यंतच गुंतवणूक करता येईल. महिला सन्मान बचत प्रमाणपत्र योजनेअंतर्गत फक्त महिलाच खाते उघडू शकतात. अल्पवयीन मुलींच्या नावाने पालक खाते उघडू शकतात.

अधिक गुंतवणूक वाढेल
इकॉनॉमिक टाईम्सच्या वृत्तानुसार, महिला सन्मान बचत प्रमाणपत्र योजनेत दोन वर्षांच्या मुदतीसह आणखी गुंतवणूक होण्याची शक्यता आहे. सध्या बँकांमध्ये या योजनेची खाती उघडली जात नाहीत. बँकांनी ही योजना राबविण्याची तयारी केली आहे. महिला सन्मान बचत प्रमाणपत्र योजनेची खाती जेव्हा बँकांमध्ये सुरू होतील, तेव्हा या योजनेत पैसे गुंतवणाऱ्या महिलांची संख्या आणखी वाढेल.

ज्येष्ठ नागरिक बचत योजनेतील गुंतवणूकही वाढली
अर्थमंत्री निर्मला सीतारामन यांनी अर्थसंकल्प 2023 मध्ये ज्येष्ठ नागरिक बचत योजनेतील गुंतवणुकीची मर्यादा दुप्पट करून 30 लाख रुपये केली. सरकारच्या या निर्णयानंतर या योजनेत खर्च होणारा पैसाही वाढला आहे.

या आर्थिक वर्षाच्या पहिल्या दोन महिन्यांतच ज्येष्ठ नागरिक बचत योजनेत 23,000 कोटी रुपयांची गुंतवणूक करण्यात आली आहे. गेल्या आर्थिक वर्षात याच कालावधीत हा आकडा 6,000 कोटी रुपये होता. गुंतवणुकीची मर्यादा वाढवल्याचा परिणाम स्पष्टपणे दिसून येतो. जून तिमाहीत ज्यांनी या योजनेत पैसे ठेवले त्यांना 8.2 टक्के वार्षिक व्याज मिळाले. त्याच वेळी, गेल्या तिमाहीत व्याज दर 8 टक्के होता.