चाळीसगावमध्ये ११ किलोचे एमडी ड्रग्ज जप्त ; तरुण पोलिसांच्या ताब्यात

चाळीसगाव । नाशिक येथील ललित पाटीलच्या ड्रग्ज प्रकरण राज्यभरात गांजल्यानंतर आता जळगाव जिल्ह्यातील चाळीसगावमध्ये पोलिसांनी ११ किलोचे ड्रग्ज जप्त करत एका तरुणाला ताब्यात घेतले आहे. शेख मोहम्मद आरिफ उर्फ शादाब मोहम्मद जमील (वय २३, रा. भिवंडी, ता. ठाणे, ह. मु. साठफुटी रोड, पॉवर हाउस, जिरेबाबा दर्ग्याजवळ, मालेगाव) असं अटक केलेल्या तरुणाचे नाव असून तो या ड्रगची शहरात कोणाला विक्री करणार होता, याचा पोलिस शोध घेत आहेत.

हवालदार आशुतोष सोनवणे यांनी दिलेल्या फिर्यादीनुसार, शहरातील मालेगाव रस्त्यावरील नवीन पुलाच्या खाली आज दुपारी सव्वातीनच्या सुमारास बजाज कंपनीच्या काळ्या रंगाच्या पल्सर मोटारसायकलवरून (एमएच ४१, एएच ७१७५) संशयित आरोपी शेख मोहम्मद आरिफ उर्फ शादाब मोहम्मद जमील (वय २३, रा. चौथा माळा, समरुरू बाग, तेली चाळ, हसनसेठ बिल्डिंग, भिवंडी, ता. ठाणे, ह. मु. साठफुटी रोड, पॉवर हाउस, जिरेबाबा दर्ग्याजवळ, मालेगाव) हा संशयास्पदरीत्या फिरताना मिळून आला.

त्याची पोलिसांनी चौकशी करून त्याच्याजवळची बॅग तपासली असता, त्यात सुमारे २० हजार ३४० रुपये किमतीचे पारदर्शक झिप पाऊच फिक्कट पिवळसर रंगाचे क्रिस्टल एमडी हा अमली पदार्थ मिळून आला. त्याला पोलिसांनी दुचाकी व मुद्देमाल अशा एकूण ८० हजार ३४० रुपयांच्या ऐवजासह पकडून त्याच्याविरोधात गुन्हा दाखल केला.

ही कारवाई करणाऱ्या पथकात पोलिस निरीक्षक संदीप पाटील, निवडणूक नायब तहसीलदार संदेश निकुंभ, पोलिस कर्मचारी विनोद भोई, पंढरीनाथ पवार, राहुल सोनवणे, संदीप रमेश पाटील, नितीन वाल्हे, मुकेश पाटील, महेंद्र पाटील, भूषण पाटील, रवींद्र बच्छे, ज्ञानेश्वर पाटोळे, महेश बागूल, संदीप बाळासाहेब पाटील, आशुतोष सोनवणे, वजन मापाडी हितेश जैन, छायाचित्रकार अनिकेत जाधव यांचा सहभाग होता.