जळगाव | जळगाव शहरातील अयोध्यानगर परिसरात गावठी कट्टा बाळगून संशयास्पदरीत्या फिरणाऱ्या एका तरुणाला एमआयडीसी पोलिसांच्या गुन्हे शोध पथकाने अटक केली. आरोपीकडून एक गावठी बनावटीचा कट्टा, दोन जिवंत काडतुसे आणि बजाज चेतक इलेक्ट्रिक मोपेड असा एकूण १ लाख २२ हजार रुपयांचा मुद्देमाल जप्त करण्यात आला आहे.
एमआयडीसी पोलीस ठाण्याचे पोलीस निरीक्षक बबन आहेर यांना १५ जुलै रोजी अयोध्यानगर परिसरात एक इसम अवैधरित्या शस्त्र घेऊन फिरत असल्याची गोपनीय माहिती मिळाली होती. या माहितीच्या आधारे पोलीस उपनिरीक्षक चंद्रकांत धनके, सफौ विजयसिंग पाटील आणि गुन्हे शोध पथकाने अयोध्यानगर ते गौरव हॉटेलकडे जाणाऱ्या सर्व्हिस रोडवर सापळा रचला.
संशयिताला ताब्यात घेऊन झडती घेतली असता त्याच्या कमरेजवळ एक गावठी कट्टा आणि दोन जिवंत काडतुसे आढळून आली. चौकशीत त्याने आपले नाव अभिषेक संजय हवलदार (वय २३) असे सांगितले. तो मूळचा सोलापूर जिल्ह्यातील असून सध्या जळगावातील रामेश्वर कॉलनी येथे वास्तव्यास असल्याची माहिती पोलिसांनी दिली.
या कारवाईत आरोपीकडून २० हजार रुपयांचा गावठी कट्टा, २ हजार रुपयांची दोन जिवंत काडतुसे आणि १ लाख रुपयांची बजाज चेतक इलेक्ट्रिक मोपेड असा एकूण १ लाख २२ हजार रुपयांचा मुद्देमाल जप्त करण्यात आला.या प्रकरणी एमआयडीसी पोलीस ठाण्यात भारतीय शस्त्र अधिनियम कलम ३/२५ तसेच संबंधित कायद्यांनुसार गुन्हा दाखल करण्यात आला आहे. आरोपीला न्यायालयात हजर केले असता त्याला पोलीस कोठडी सुनावण्यात आली असून पुढील तपास पोलीस नाईक प्रदीप चौधरी करीत आहेत.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत, उपविभागीय पोलीस अधिकारी नितीन गणापुरे यांच्या मार्गदर्शनाखाली एमआयडीसी पोलीस ठाण्याच्या गुन्हे शोध पथकाने केली.
Discussion about this post