जळगाव विधान परिषद निवडणूक: जिल्ह्यात ९७.७८ टक्के विक्रमी मतदान

जळगाव । जळगाव स्थानिक प्राधिकरण मतदारसंघाच्या विधान परिषद निवडणुकीसाठी आज, गुरुवारी अत्यंत चुरशीने आणि शांततेत मतदान प्रक्रिया पार पडली. संपूर्ण जिल्ह्याचे लक्ष लागलेल्या या निवडणुकीत एकूण ९७.७८ टक्के इतक्या विक्रमी मतदानाची नोंद झाली आहे. मात्र, अपेक्षेप्रमाणे चाळीसगावमध्ये नगरसेवकांनी टाकलेल्या बहिष्काराच्या अस्त्रामुळे तेथील मतदानाचा टक्का लक्षणीयरीत्या घसरल्याचे पाहायला मिळाले.

निवडणूक विभागाच्या माहितीनुसार, सकाळी ८ ते सायंकाळी ४ या वेळेत जिल्ह्यातील विविध मतदान केंद्रांवर मतदारांनी आपला हक्क बजावला. मतदारसंघातील एकूण ६३० मतदारांपैकी ६१६ मतदारांनी मतदान केले, तर १४ मतदार विविध कारणांमुळे अनुपस्थित राहिले.

जिल्ह्यातील अमळनेर, फैजपूर, जळगाव, एरंडोल आणि पाचोरा या मतदान केंद्रांवर 100 टक्के मतदानाची नोंद झाली. भुसावळ केंद्रात 118 पैकी 116 मतदारांनी मतदान करत 98.31 टक्के मतदान झाले.

दरम्यान, चाळीसगाव मतदान केंद्रात सर्वात कमी 70.73 टक्के मतदान झाले. येथे एकूण 41 मतदारांपैकी केवळ 29 मतदारांनी मतदान केले, तर 12 मतदारांनी मतदान केले नाही. चाळीसगावमधील काही नगरसेवकांनी मतदानावर बहिष्कार टाकल्याच्या पार्श्वभूमीवर या केंद्रातील मतदानाची टक्केवारी लक्षणीयरीत्या कमी राहिली.

मतदानाच्या आकडेवारीनुसार, जिल्ह्यातील 315 पुरुष मतदारांपैकी 309 (98.10 टक्के) आणि 315 महिला मतदारांपैकी 307 (97.46 टक्के) मतदारांनी मतदानाचा हक्क बजावला.

एकूणच जिल्ह्यात मतदानाची प्रक्रिया शांततेत पार पडली असून, जवळपास शंभर टक्के मतदान झाल्याने स्थानिक स्वराज्य संस्था मतदारसंघातील निवडणुकीकडे राजकीय वर्तुळाचे लक्ष लागले आहे.