मुंबई । जळगावच्या राजकारणात पुन्हा एकदा आमदार एकनाथ खडसे यांच्या राजकीय भूमिकेची चर्चा रंगू लागली आहे. भाजपचे राष्ट्रीय सरचिटणीस विनोद तावडे यांनी नुकतीच खडसे यांच्या निवासस्थानी भेट घेतल्यानंतर त्यांच्या भाजपमध्ये पुनरागमनाच्या चर्चांना उधाण आले होते. मात्र, त्यानंतर अवघ्या दोन दिवसांतच खडसे यांनी मुंबईतील ‘मातोश्री’वर जाऊन शिवसेना (ठाकरे गट) पक्षप्रमुख उद्धव ठाकरे यांची सदिच्छा भेट घेतल्याने राजकीय वर्तुळात नव्या चर्चांना सुरुवात झाली आहे.
विनोद तावडे यांच्या भेटीनंतर खडसे भाजपमध्ये घरवापसी करणार असल्याच्या चर्चांना वेग आला होता. मात्र, शुक्रवारी उद्धव ठाकरे यांच्यासोबत झालेल्या भेटीमुळे या चर्चांना वेगळेच वळण मिळाले आहे. या भेटीमुळे खडसे कोणता राजकीय निर्णय घेणार, याबाबत पुन्हा एकदा तर्कवितर्क सुरू झाले आहेत.
या भेटीवेळी शिवसेना (उद्धव बाळासाहेब ठाकरे) पक्षाचे खासदार तथा प्रवक्ते संजय राऊत हेही उपस्थित होते. तसेच खडसे यांचे समर्थक डॉ. अभिषेक ठाकूर यांनीही या भेटीत सहभाग घेतला.
Discussion about this post