सोनम वांगचूक यांचं उपोषण मोडून काढल्यानंतर अभिजीत दीपके यांच्या दोन मोठ्या घोषणा

नवी दिल्ली | दिल्ली पोलिसांनी दिल्ली उच्च न्यायालयाच्या आदेशानुसार सामाजिक कार्यकर्ते सोनम वांगचूक यांना आंदोलनस्थळावरून ताब्यात घेऊन रुग्णालयात दाखल केल्यानंतर आंदोलनाला नवे वळण मिळाले आहे. वांगचूक यांच्यासोबत आंदोलनात सहभागी असलेले कॉकरोच जनता पार्टीचे संस्थापक अभिजीत दीपके यांनी आजपासून आमरण उपोषण सुरू करण्याची घोषणा केली असून 20 जुलै रोजी संसदेकडे मोर्चा काढण्याचा इशारा दिला आहे.

दिल्ली पोलिसांनी शुक्रवारी सकाळी कारवाई करत सोनम वांगचूक यांना वैद्यकीय उपचारांसाठी रुग्णालयात दाखल केले. या कारवाईदरम्यान आंदोलनस्थळी काही काळ गोंधळाचे वातावरण निर्माण झाले. त्यानंतर अभिजीत दीपके यांनी सोशल मीडियावर पोस्ट करत, “दिल्ली पोलिसांनी माझ्यावर मारहाण करून ताब्यात घेतले,” असा आरोप केला.

NEET पेपर लीकप्रकरणी आंदोलन

नीट (NEET) परीक्षेच्या कथित पेपर लीकप्रकरणी केंद्रीय शिक्षण मंत्री धर्मेंद्र प्रधान यांच्या राजीनाम्याची मागणी करत सोनम वांगचूक 28 जूनपासून आमरण उपोषणावर होते. या आंदोलनाला देशभरातून विविध सामाजिक, राजकीय आणि विद्यार्थी संघटनांचा पाठिंबा मिळत आहे.

‘मागे हटू नका, लढा सुरूच राहील’

अभिजीत दीपके यांनी आंदोलनकर्त्यांना आवाहन करत म्हटले, “मी आजपासून आमरण उपोषण सुरू करत आहे. कोणीही मागे हटू नका. ही चळवळ आणखी तीव्र होणार आहे. सर्वांनी जंतर-मंतरवर यावे. ठरल्याप्रमाणे 20 जुलै रोजी आपण संसदेकडे मोर्चा काढणार आहोत.”

गेल्या काही दिवसांत विरोधी पक्षातील अनेक नेत्यांनी आंदोलनस्थळी भेट देऊन सोनम वांगचूक यांना पाठिंबा दर्शवला होता. तसेच सामाजिक, राजकीय क्षेत्रातील मान्यवरांसह बॉलिवूडमधील काही व्यक्तींनीही या आंदोलनाला समर्थन दिले आहे.