जळगाव । पाचोरा पोलीस ठाण्यातील तीन वाहतूक पोलिसांना निलंबित करण्यात आले आहे. एका वाहतूक पोलिसाचा ट्रक चालकाकडून पैसे घेत असतानाचा व्हिडिओ सोशल मीडियावर व्हायरल झाल्यानंतर ही कारवाई करण्यात आल्याची माहिती पोलीस अधिक्षक डॉ. महेश्वर रेड्डी यांनी दिली. या कारवाईने खळबळ उडाली आहे.
व्हिडीओमध्ये काय?
पाचोरा येथील एका वाहतूक पोलिसाचा ट्रक चालकाकडून पैसे घेत असतानाचा व्हिडिओ सोशल मीडियावर व्हायरल झाला आहे. या व्हिडिओमध्ये वाहतूक पोलील कर्मचारी आधी ट्रक चालकाला थांबवत आहे. नंतर ट्रकचालक वाहतूक पोलिसाला या ट्रकमध्ये केळी असल्याचे सांगत आहे. नंतर वाहतूक पोलीस १०० रूपये काढ असे म्हणत आहे. त्यानंतर चालक ‘ओ दादा आम्ही कायम देतस, आते १०० नको ५० घ्या’ असं अहिराणी भाषेत म्हणत आहे. त्यानंतर वाहतूक पोलीस ५० नाही, १०० द्या, असे म्हणत आहे. वाहतूक पोलीस चालकाकडून पैसे घेऊन पुढे जातो. याचा व्हिडिओ ट्रक चालकाने काढला आणि सोशल मीडियात शेअर केला.
आता या व्हायरल व्हिडिओची पोलीस अधिक्षक डॉ. महेश्वर रेड्डी यांनी दखल घेत ट्रक चालकांकडून पैसे घेणाऱ्या पवन पाटील यांना निलंबित केले आहे. या व्हिडिओमध्ये आणखी दोन पोलीस कर्मचारीही उपस्थित असल्याने त्यांची भूमिका संशयास्पद आढळून आली आहे. त्यामुळे त्यांनाही निलंबित करण्यात आले आहे.या घटनेची चौकशी करून दोषींवर कठोर कारवाई करण्यात येईल, असे पोलीस अधीक्षक डॉ. महेश्वर रेड्डी यांनी सांगितले आहे.या घटनेमुळे जिल्ह्यातील पोलीस दलात खळबळ उडाली आहे. या घटनेमुळे पोलिसांच्या प्रतिमेला मोठा धक्का बसला आहे.
Discussion about this post