मुंबई : महाराष्ट्राच्या राजकारणात पुन्हा एकदा मंत्रिमंडळातील संभाव्य फेरबदलांच्या चर्चांना उधाण आले आहे. उपमुख्यमंत्री एकनाथ शिंदे यांच्या नेतृत्वाखालील शिवसेनेत काही मंत्र्यांच्या कामगिरीचा आढावा घेतला जात असून, अकार्यक्षम मंत्र्यांना मंत्रिमंडळातून डच्चू देऊन तरुण आणि सक्रिय आमदारांना संधी दिली जाण्याची शक्यता राजकीय वर्तुळात व्यक्त केली जात आहे. दसरा मेळाव्यानंतर शिंदे गटात ‘भाकरी फिरवण्याची’ तयारी सुरू असल्याची चर्चा असून, आगामी हिवाळी अधिवेशनाच्या पार्श्वभूमीवर या हालचालींना महत्त्व प्राप्त झाले आहे.
अकार्यक्षम मंत्र्यांना डच्चू मिळणार?
राजकीय सूत्रांच्या माहितीनुसार, मंत्रिमंडळातील काही मंत्र्यांच्या कामकाजाबाबत एकनाथ शिंदे नाराज असल्याची चर्चा आहे. सत्ता स्थापन होऊन अडीच वर्षांचा कालावधी पूर्ण होत असताना काही मंत्र्यांकडून अपेक्षित कामगिरी झाली नसल्याचे सांगितले जात आहे. त्यामुळे मंत्र्यांच्या कामकाजाचा आढावा घेऊन काहींची मंत्रिमंडळातून गच्छंती करण्याचा निर्णय घेतला जाऊ शकतो, अशी शक्यता वर्तवली जात आहे.
मात्र, या संभाव्य फेरबदलांबाबत अद्याप कोणतीही अधिकृत घोषणा झालेली नाही. त्यामुळे मंत्रिमंडळात नेमके कोणते बदल होणार आणि कोणत्या मंत्र्यांना संधी गमवावी लागणार, याबाबतचे चित्र अद्याप स्पष्ट झालेले नाही.
तरुण आमदारांना संधी, राज्यमंत्र्यांची पदोन्नती?
संभाव्य फेरबदलांमध्ये तरुण आणि सक्रिय आमदारांना मंत्रिपदाची संधी मिळण्याची शक्यता चर्चेत आहे. तसेच, सध्या राज्यमंत्री म्हणून काम करणाऱ्या काही नेत्यांना कॅबिनेट मंत्रिपदावर बढती दिली जाऊ शकते, अशीही चर्चा राजकीय वर्तुळात सुरू आहे.असे बदल झाल्यास शिंदे यांच्या शिवसेनेतील अंतर्गत राजकीय समीकरणांमध्ये महत्त्वपूर्ण बदल होऊ शकतात. नव्या चेहऱ्यांना संधी देऊन पक्षातील कार्यकर्ते आणि आमदारांना बळ देण्याचा प्रयत्न या माध्यमातून केला जाऊ शकतो.
दरम्यान, मंत्रिमंडळातील संभाव्य फेरबदलांमुळे कोणत्या मंत्र्यांचे पद कायम राहणार, कोणाला डच्चू मिळणार आणि नव्या चेहऱ्यांपैकी कोणाला संधी मिळणार, याबाबत उत्सुकता वाढली आहे. दसऱ्यानंतर सुरू झालेल्या या चर्चांना आगामी काळात प्रत्यक्ष निर्णयाचे स्वरूप मिळते का, याकडे राज्यातील राजकीय वर्तुळाचे लक्ष लागले आहे.
Discussion about this post