आजपासून एसटीचा नवा नियम! ‘या’ महिलांना अर्ध्या तिकिटाऐवजी द्यावे लागणार पूर्ण भाडे

मुंबई । महाराष्ट्र राज्य मार्ग परिवहन महामंडळाच्या (MSRTC) बसने सवलतीच्या दरात प्रवास करणाऱ्या महिला आणि ज्येष्ठ नागरिकांसाठी महत्त्वाचा नियम लागू झाला आहे. १ सप्टेंबर २०२६ पासून एसटीच्या अर्ध्या तिकिटाच्या सवलतीचा लाभ घेण्यासाठी NCMC कार्ड आवश्यक करण्यात आले आहे. त्यामुळे कार्ड नसल्यास पात्र प्रवाशांना सवलतीऐवजी पूर्ण तिकीट आकारले जाण्याची शक्यता आहे.

महामंडळाने सवलतीच्या तिकीट व्यवस्थेचे डिजिटायझेशन करण्यासाठी NCMC प्रणाली लागू केली आहे. या प्रक्रियेंतर्गत आतापर्यंत सुमारे १.११ कोटी प्रवाशांची NCMC कार्डसाठी नोंदणी झाल्याची माहिती आहे. कार्डची नोंदणी आणि वितरणाची जबाबदारी E-Bix Technologies Ltd. या कंपनीकडे देण्यात आली आहे.

महिलांसह ६५ ते ७५ वयोगटातील ज्येष्ठांना नियम लागू

नव्या व्यवस्थेनुसार एसटी बसमधून प्रवास करणाऱ्या महिला प्रवाशांसह ६५ ते ७५ वर्षे वयोगटातील ज्येष्ठ नागरिकांना अर्ध्या तिकिटाची सवलत घेण्यासाठी NCMC कार्डचा वापर करावा लागणार आहे. प्रवासाच्या वेळी कार्ड उपलब्ध नसल्यास सवलतीचे तिकीट नाकारले जाऊ शकते आणि प्रवाशाकडून तिकिटाची पूर्ण रक्कम घेतली जाऊ शकते. त्यामुळे एसटीने प्रवास करण्यापूर्वी संबंधित प्रवाशांनी आपले NCMC कार्ड सोबत असल्याची खात्री करावी, असे आवाहन करण्यात आले आहे.

कार्डमध्ये रक्कम असणेही आवश्यक

NCMC कार्डचा वापर करून तिकीट काढताना कार्डमध्ये आवश्यक रक्कम उपलब्ध असणे गरजेचे आहे. त्यामुळे प्रवासापूर्वी कार्डमध्ये पुरेशी रक्कम आहे की नाही, तसेच कार्ड टॉप-अप केले आहे की नाही, याची खात्री करण्याचे आवाहन एसटी महामंडळाने केले आहे.या नियमाच्या अंमलबजावणीसाठी महामंडळाने राज्यातील सर्व एसटी आगारांना Standard Operating Procedure (SOP) पाठवली आहे. महिला आणि ज्येष्ठ नागरिकांना प्राधान्य देत कार्ड नोंदणीची प्रक्रिया राबवली जात असून, भविष्यात सवलतीस पात्र असलेल्या इतर प्रवर्गांचाही NCMC प्रणालीमध्ये समावेश केला जाणार आहे.

७५ वर्षांवरील ज्येष्ठांना तूर्तास दिलासा

दरम्यान, ७५ वर्षांवरील ज्येष्ठ नागरिकांसाठी NCMC कार्डची सक्ती तूर्तास पुढे ढकलण्यात आली आहे. या वयोगटातील नागरिकांच्या नोंदणीदरम्यान बायोमेट्रिक प्रक्रियेत अडचणी येत असल्याचे समोर आले आहे. विशेषतः अनेक ज्येष्ठ नागरिकांचे बोटांचे ठसे व्यवस्थित नोंदवले जात नसल्याने त्यांना कार्ड मिळवताना अडचणी येत आहेत.त्यामुळे ७५ वर्षांवरील ज्येष्ठांना सध्या या सक्तीपासून दिलासा देण्यात आला आहे. मात्र, पुढील काळात या प्रवर्गासाठीही डिजिटल सवलत व्यवस्था लागू करण्याबाबत निर्णय घेतला जाऊ शकतो.

NCMC कार्डसाठी नोंदणी नसेल तर काय कराल?

ज्या महिला आणि पात्र ज्येष्ठ नागरिकांनी अद्याप NCMC कार्डसाठी नोंदणी केलेली नाही, त्यांनी जवळच्या एसटी आगाराशी संपर्क साधून नोंदणी प्रक्रिया पूर्ण करावी, असे आवाहन महामंडळाने केले आहे.सवलतीच्या तिकीट व्यवस्थेत पारदर्शकता आणणे, पात्र प्रवाशांची डिजिटल पद्धतीने पडताळणी करणे आणि तिकीट व्यवस्थेचे आधुनिकीकरण करणे, हा NCMC प्रणाली लागू करण्यामागील प्रमुख उद्देश असल्याचे महामंडळाकडून सांगण्यात आले आहे.