नवी दिल्ली । नीट पेपरफुटी प्रकरणाच्या पार्श्वभूमीवर दिल्लीतील आंदोलन अधिक तीव्र होत असताना उपोषणावर असलेले सामाजिक कार्यकर्ते सोनम वांगचुक यांच्या उपचाराबाबत दिल्ली उच्च न्यायालयाने महत्त्वाचा निर्णय दिला आहे. वांगचुक यांना सफदरजंग रुग्णालयातून गुरुग्राम येथील मेडांता रुग्णालयात हलवण्यास न्यायालयाने परवानगी दिली आहे.
वांगचुक यांना उपोषणादरम्यान प्रकृती खालावल्याने रुग्णालयात दाखल करण्यात आले होते. त्यांच्या पत्नी गीतांजली आंगमो यांनी दिल्ली उच्च न्यायालयात याचिका दाखल करून वांगचुक यांच्यावर खासगी रुग्णालयात उपचार करण्याची परवानगी मागितली होती. उपोषण सुरू असताना त्यांना जबरदस्तीने रुग्णालयात दाखल करण्यात आल्याचा आरोपही त्यांनी केला होता.
मंगळवारी झालेल्या सुनावणीत केंद्र सरकारने न्यायालयात स्पष्ट केले की, वांगचुक यांना मेडांता रुग्णालयात हलवण्यास सरकारची कोणतीही हरकत नाही. मात्र, रुग्णालय बदलण्याचा निर्णय हा केवळ डॉक्टरांच्या वैद्यकीय सल्ल्यानुसारच घेतला जावा, रुग्णाच्या इच्छेनुसार नव्हे, अशी भूमिका सरकारतर्फे मांडण्यात आली.
केंद्र सरकारचे प्रतिनिधित्व करणारे सॉलिसिटर जनरल तुषार मेहता यांनी न्यायालयाला सांगितले की, वांगचुक यांचा डिस्चार्ज आणि पुढील उपचाराबाबतचा निर्णय डॉक्टरांच्या सल्ल्यावर आधारित असावा. त्यांच्या आजूबाजूचे काही लोक त्यांच्या आरोग्यापेक्षा आंदोलनाला अधिक प्राधान्य देत असल्याची चिंताही त्यांनी व्यक्त केली. दोन्ही बाजूंचा युक्तिवाद ऐकल्यानंतर दिल्ली उच्च न्यायालयाने वांगचुक यांना मेडांता रुग्णालयात हलवण्यास परवानगी दिली.
दरम्यान, नीट पेपरफुटी प्रकरणावरून दिल्लीतील आंदोलन अद्याप सुरू असून, आंदोलकांनी केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी कायम ठेवली आहे. दुसरीकडे, सफदरजंग रुग्णालयाने सोमवारी सायंकाळी जारी केलेल्या वैद्यकीय अहवालानुसार सोनम वांगचुक यांची प्रकृती सध्या स्थिर असून त्यांच्यावर तज्ज्ञ डॉक्टरांचे पथक उपचार आणि देखरेख करत आहे.
Discussion about this post