जळगाव । यावल तालुक्यातील डांभुर्णी येथे गावठी पिस्तुलातून हवेत गोळीबार करणाऱ्या कोळन्हावी ग्रामपंचायतीच्या सरपंचाला पोलिसांनी काही तासांतच जळगावातून अटक केली. विकास उर्फ गोटू जगन्नाथ सोळंके (वय ३७) असे अटक केलेल्या आरोपीचे नाव आहे. पोलिसांनी त्याच्याकडून गावठी पिस्तूल, मॅगझीन आणि एक जिवंत काडतूस जप्त केले आहे.
२७ ऑगस्ट रोजी रात्री आठच्या सुमारास डांभुर्णी गावातील चौकात गोळीबार झाल्याची माहिती यावल पोलिसांना मिळाली. पोलिसांनी घटनास्थळी पाहणी केली असता किनगाव रोडवरील एका दुकानाजवळ गोळीबाराची रिकामी पुंगळी आढळली. फॉरेन्सिक पथकाने घटनास्थळावरील पुरावेही संकलित केले.
गोळीबारानंतर आरोपी जळगावच्या दिशेने गेल्याचे समोर आल्यानंतर यावल पोलिस आणि स्थानिक गुन्हे शाखेच्या पथकाने संयुक्त शोधमोहीम राबवली. रात्री सुमारे १ वाजता कालंका माता मंदिर परिसरातून आरोपीला ताब्यात घेण्यात आले.
चौकशीत डांभुर्णीतील काही तरुणांसोबत झालेल्या वादातून त्यांच्यावर दहशत निर्माण करण्याच्या उद्देशाने गोळीबार केल्याचे आरोपीने सांगितल्याची माहिती पोलिसांनी दिली. त्याने गोळीबारासाठी वापरलेले पिस्तूल कोळन्हावी शिवारातील आदर्श हॉटेलजवळील शेतात लपवून ठेवल्याचे सांगितल्यानंतर पोलिसांनी तेथून शस्त्र व जिवंत काडतूस जप्त केले.
या प्रकरणी भारतीय न्याय संहिता व भारतीय हत्यार कायद्यानुसार गुन्हा दाखल करण्यात आला असून, पुढील तपास यावल पोलिसांकडून सुरू आहे. घटनेनंतर परिसरात शांतता असून पोलिसांचा बंदोबस्त कायम आहे.
Discussion about this post