मुंबई : सोशल मीडियावर एका पोलीस कर्मचाऱ्याचा तरुणाला धमकावत असल्याचा व्हिडिओ व्हायरल झाल्यानंतर मुंबई पोलिसांनी संबंधित पोलीस कर्मचाऱ्यावर निलंबनाची कारवाई केली आहे. पत्रकार परिषदेत मनसे अध्यक्ष राज ठाकरे यांनी या व्हिडिओचा उल्लेख करत गंभीर प्रश्न उपस्थित केल्यानंतर काही तासांतच गृहखात्याकडून ही कारवाई करण्यात आली.व्हायरल व्हिडिओमध्ये संबंधित पोलीस एका तरुणाला “पुन्हा दिसलास तर ५० ग्रॅमची पावडर टाकेन” अशी धमकी देताना दिसत आहे. या वक्तव्यामुळे सोशल मीडियावर संताप व्यक्त होत असून, पोलिसांच्या कार्यपद्धतीवर प्रश्नचिन्ह उपस्थित करण्यात आले.कारवाई करण्यात आलेल्या पोलीस कर्मचाऱ्याचे नाव पवन सांगळे असून तो सायन पोलीस ठाण्यात चालक (ड्रायव्हर) म्हणून कार्यरत आहे. व्हिडिओ समोर आल्यानंतर मुंबई पोलिसांनी त्याला तात्काळ निलंबित केले.
राज ठाकरेंचा सवाल
राज ठाकरे यांनी संयुक्त पत्रकार परिषदेत हा व्हिडिओ दाखवत सरकारवर टीका केली. ते म्हणाले, “माझ्याकडे एक व्हिडिओ आला आहे. मुलं टॅक्सीने जात असताना पोलीस ‘५० ग्रॅम पावडर टाकेन’ अशी धमकी देतो. हा पोलीस ड्रग्स सप्लायर आहे का? पोलिसांकडे पावडर कुठून आली? नेमकं चाललंय तरी काय?”
काँग्रेसची न्यायालयीन चौकशीची मागणी
दरम्यान, महाराष्ट्र काँग्रेसचे प्रदेशाध्यक्ष हर्षवर्धन सपकाळ यांनीही या प्रकरणाची गंभीर दखल घेतली. त्यांनी पोलीस महासंचालकांची भेट घेऊन संबंधित पोलीस कर्मचाऱ्याला निलंबित करण्याची मागणी केली होती. सपकाळ म्हणाले, “पोलीस जर ‘५० ग्रॅम पावडर’ची भाषा करत असेल, तर अंमली पदार्थांच्या रॅकेटमध्ये पोलिसांचाही संबंध आहे का, असा प्रश्न निर्माण होतो. या प्रकरणाची उच्च न्यायालयाच्या न्यायाधीशांच्या देखरेखीखाली चौकशी व्हावी.”
आंदोलनातील आणखी एक व्हिडिओही चर्चेत
दरम्यान, दिल्लीतील विद्यार्थ्यांच्या आंदोलनादरम्यान आणखी एक व्हिडिओ सोशल मीडियावर मोठ्या प्रमाणात व्हायरल होत आहे. या व्हिडिओमध्ये पोलिसांनी ताब्यात घेतलेल्या काही आंदोलक विद्यार्थ्यांना पोलिस व्हॅनमध्ये बसवले असताना, बाहेर उभ्या असलेल्या आंदोलनकर्त्यांनी व्हॅनचा दरवाजा उघडल्याने विद्यार्थी एकामागून एक खाली उतरून पळताना दिसत आहेत.
या व्हिडिओवरून सोशल मीडियावर दोन मतप्रवाह निर्माण झाले आहेत. काही जण विद्यार्थ्यांच्या कृतीचे समर्थन करत आहेत, तर दुसरा गट ही घटना कायदा-सुव्यवस्थेला आव्हान देणारी असल्याचे म्हणत टीका करत आहे.
Discussion about this post