MPSC च्या विद्यार्थ्यांना खुशखबर ; तब्बल १६७१७ पदांसाठी महाभरती

महाराष्ट्र लोकसेवा आयोगामार्फत (MPSC) सरकारी नोकरीची तयारी करणाऱ्या तरुणांसाठी मोठी आनंदाची बातमी आहे. महाराष्ट्र गट-क सेवा संयुक्त पूर्व परीक्षा २०२६ अंतर्गत भरती होणाऱ्या पदांच्या संख्येत मोठी वाढ करण्यात आली असून, आता एकूण १६ हजार ७१७ पदे भरली जाणार आहेत. विशेष म्हणजे, या भरतीत लिपिक-टंकलेखक पदांसाठी सर्वाधिक ३ हजार ९६६ जागा, तर तलाठी पदांसाठी १ हजार ८४० जागा उपलब्ध झाल्या आहेत. वाढीव जागांमुळे हजारो उमेदवारांना सरकारी नोकरीची संधी मिळणार आहे.

महाराष्ट्र लोकसेवा आयोगाने पदसंख्या वाढीसंदर्भात नवीन पत्रक प्रसिद्ध केले आहे. राज्यातील सरकारी भरती प्रक्रिया अधिक पारदर्शक आणि सुरळीत व्हावी, यासाठी शासनाने स्थापन केलेल्या उच्चस्तरीय समितीने काही महत्त्वपूर्ण सूचना केल्या होत्या. त्यानंतर विविध शासकीय विभागांकडून प्राप्त झालेल्या मागणीपत्रांच्या आधारे पदसंख्या वाढविण्याचा निर्णय घेण्यात आला आहे.

२५ प्रशासकीय विभागांत १६,७१७ पदांची भरती

आयोगाच्या नव्या पत्रकानुसार, राज्यातील २५ प्रशासकीय विभागांमध्ये एकूण १६ हजार ७१७ पदे भरली जाणार आहेत. यामध्ये लिपिक-टंकलेखक पदांसाठी सर्वाधिक ३ हजार ९६६ जागा निश्चित करण्यात आल्या आहेत. वैद्यकीय शिक्षण आणि औषधी द्रव्ये विभागात ३ हजार ९११ पदांची भरती होणार आहे. तर महसूल विभागातील ग्राम महसूल अधिकारी अर्थात तलाठी पदांसाठी १ हजार ८४० जागा उपलब्ध करून देण्यात आल्या आहेत.

या भरतीमध्ये विविध पदांसाठी सामाजिक आरक्षण आणि समांतर आरक्षणानुसार जागांचा तपशीलही जाहीर करण्यात आला आहे. त्यामुळे उमेदवारांना आपल्या प्रवर्गानुसार उपलब्ध पदांची माहिती घेता येणार आहे.

वयोमर्यादेत एक वर्षाची सवलत; अर्जाची पुन्हा संधी

या भरती प्रक्रियेत उमेदवारांना आणखी एक मोठा दिलासा मिळाला आहे. शासनाने कमाल वयोमर्यादेत एक वर्षाची सवलत देण्याचा निर्णय घेतला आहे. त्याचबरोबर वाढीव पदांमुळे उमेदवारांना नव्याने अर्ज करण्याची किंवा पदांचे विकल्प सादर करण्याची संधी उपलब्ध करून देण्यात आली आहे.

त्यानुसार, १३ नोव्हेंबर ते २७ नोव्हेंबर २०२६ या कालावधीत ऑनलाइन सुविधा उपलब्ध राहणार आहे. त्यामुळे यापूर्वी अर्ज केलेल्या उमेदवारांना वाढीव पदांचा विचार करून आवश्यक बदल करता येतील.

असा करा ऑनलाइन अर्ज

इच्छुक उमेदवारांनी महाराष्ट्र लोकसेवा आयोगाच्या अधिकृत वेबसाइटला भेट द्यावी. त्यानंतर ‘ONLINE FACILITIES’ मधील ‘Online Application System’ हा पर्याय निवडावा. नवीन उमेदवारांनी ‘New User Registration’ करून नोंदणी पूर्ण करावी, तर यापूर्वी नोंदणी केलेल्या उमेदवारांनी आपल्या लॉगिनद्वारे प्रवेश करावा. त्यानंतर ‘Online Application’ मध्ये जाऊन महाराष्ट्र गट-क सेवा संयुक्त पूर्व परीक्षा २०२६ हा पर्याय निवडून आवश्यक माहिती भरावी.