राज्यात गेले काही दिवस मुंढवा जमीन गैरव्यवहार प्रकरण जोरदार चर्चेत असून याप्रकरणी आता निलंबित तहसीलदार सुर्यकांत येवलेने मोठा खुलासा केला आहे. पुणे पोलिसांच्या आर्थिक गुन्हे शाखेकडे करण्यात आलेल्या ८ ते १० तासांच्या चौकशीत त्यांनी सांगितले की, मुंढवा सर्व्हे नंबर ८८ मधील सुमारे ४० एकर शासकीय जमीन बोटॅनिकल गार्डनला खाली करण्याचे पत्र पाठवण्यासाठी प्रशासनातील वरिष्ठ अधिकाऱ्यांचा प्रचंड दबाव होता.
ही जमीन सरकारने बोटॅनिकल गार्डनला ५० वर्षांच्या कराराने दिली आहे. सद्यस्थितीत या जागेचे बाजारमूल्य अंदाजे १,८०० कोटी रुपये आहे. मात्र, शीतल तेजवानी हिने ही जमीन मूळ महार वतनदारांची असल्याचा दावा करत अमेडिया एंटरप्रायजेस या कंपनीला अवघ्या ३०० कोटी रुपयांत विकल्याचा व्यवहार केला. त्यानंतर अमेडिया कंपनीच्या दबावाखाली तहसीलदार येवले यांनी २६ मे २०२५ रोजी बोटॅनिकल गार्डनला जागा खाली करण्याचे पत्र पाठवले होते.
चौकशीत येवले यांनी कबूल केले की, हे पत्र पाठवण्यासाठी प्रशासनातील एका वरिष्ठ अधिकाऱ्याने त्यांच्यावर सतत दबाव टाकला आणि वारंवार फोनही केले. सूत्रांच्या माहितीनुसार, त्या वरिष्ठ अधिकाऱ्यावर सत्ताधारी पक्षातील एका प्रभावशाली राजकीय नेत्याचा दबाव असल्याची चर्चा पोलिस दलात जोरदार आहे. या खुलाशामुळे आता त्या वरिष्ठ अधिकाऱ्याची चौकशी होण्याची आणि प्रकरणात अनेक बड्या नावांचा पर्दाफाश होण्याची शक्यता व्यक्त केली जात आहे.
Discussion about this post