मुंबई । महाराष्ट्रात मान्सूनचं आगमन झालं आहे. पूर्व विदर्भ वगळता राज्यातील जवळपास सर्वच भाग आता मान्सूननं व्यापला आहे. मागील काही दिवसापासून राज्यातील विविध भागात जोरदार पाऊस पडत आहे. आजही महाराष्ट्रात मुसळधार पावसाचा इशारा हवामान विभागाकडून देण्यात आला आहे. राज्यातील विविध भागात विजांच्या कडकडाटासह जोरदार पाऊस होण्याची शक्यता आहे.
उत्तर कोकण, मध्य महाराष्ट्र आणि विदर्भातील काही जिल्ह्यांमध्ये विजांच्या कडकडाटासह जोरदार पावसाची शक्यता हवामान विभागाकडून वर्तवण्यात आली आहे.तर दुसरीकडे कोकण आणि मराठवाड्यातील काही जिल्ह्यांमध्ये विजांच्या कडकडाटासह मुसळधार पावसाचा इशारा हवामान विभागानं दिला आहे.
दरम्यान नुसता पाऊसच पडणार नसून पावसासोबत वादळाचा इशारा देखील हवामान खात्याकडून देण्यात आला आहे. या काळात महाराष्ट्रात वादळाचा वेग ताशी 50 ते 60 किमी राहण्याचा अंदाज आहे.मुंबई आणि उपनगरांबाबत बोलायचे झाल्यास मुंबईत दिवसभर ढगाळ वातावरण राहण्याचा अंदाज आहे. मेघगर्जनेसह हलक्या ते मध्य स्वरुपाच्या पावसाची शक्यता हवामान विभागाकडून वर्तवण्यात आली आहे.हवामान विभागाकडून बीड, जालना, छत्रपती संभाजीनगर, लातूर, सातारा, सांगली, अहमदनगर, आणि विदर्भातील अनेक जिल्ह्यांना पावसाचा यलो अलर्ट देण्यात आला आहे. या भागात जोरदार पावसाची शक्यता आहे.
Discussion about this post