मुंबई । गेल्या काही दिवसांपासून असह्य उकाडा आणि कडाक्याच्या उन्हाचा सामना करणाऱ्या महाराष्ट्रातील जनतेला अखेर मान्सूनपूर्व पावसाने मोठा दिलासा दिला आहे. ठाणे, सोलापूर आणि कोकणातील काही भागांत पावसाने दमदार हजेरी लावली असून, सध्या वातावरणात गारवा निर्माण झाला आहे. दुसरीकडे, हवामान खात्याने पुणे, सातारा, मुंबई आणि मराठवाड्याच्या काही भागांत पुढील काही तास पावसाची दाट शक्यता वर्तवली आहे.
हवामान खात्याच्या अंदाजानुसार पुणे, सांगली, सातारा, सोलापूर, बीड, लातूर, नांदेड, छत्रपती संभाजीनगर, नाशिक, सिंधुदुर्ग, रत्नागिरी, रायगड तसेच मुंबई शहर आणि उपनगरांमध्ये हलक्या पावसाची शक्यता आहे. मुंबईत तापमान ३४ अंशांवर स्थिर राहणार असले तरी ढगाळ वातावरण आणि तुरळक सरींचा अंदाज व्यक्त करण्यात आला आहे.
ठाणे जिल्ह्यात शनिवारी सकाळपासूनच मान्सूनपूर्व पावसाने दमदार हजेरी लावली. शहापूर, भिवंडी, मुरबाड, मुंब्रा, घोडबंदर रोड, कळवा आणि खारेगाव परिसरात पावसाच्या सरी कोसळल्याने उकाड्यापासून नागरिकांना मोठा दिलासा मिळाला. अनेक दिवसांपासून असह्य उष्णतेने त्रस्त असलेल्या ठाणेकरांना या पावसामुळे गारव्याचा अनुभव आला.
दरम्यान, जालना जिल्ह्यातील परतूर तालुक्यात अवकाळी पावसाने मोठे नुकसान केले आहे. फुलवाडी येथील महिला शेतकरी यशोदा आब्दल यांची दीड एकरावरील केळीची बाग वादळी वाऱ्यामुळे जमीनदोस्त झाली. तसेच झाडाची फांदी अंगावर पडून एक महिला गंभीर जखमी झाली असून अनेक सोलर पॅनल्सचेही नुकसान झाले आहे. वीज आणि झाड पडल्याने पशुधन दगावल्याच्याही घटना समोर आल्या आहेत. घनसावंगी आणि परतूर तालुक्यातील अनेक गावांमध्ये या पावसामुळे शेतीचे मोठे नुकसान झाले असून शेतकऱ्यांनी तातडीने पंचनामे करून नुकसानभरपाईची मागणी केली आहे.
रत्नागिरी जिल्ह्यातील लांजा परिसरातही मेघगर्जनेसह पावसाच्या सरी कोसळल्या. उकाड्यापासून नागरिकांना दिलासा मिळाला असला तरी ऐन आंबा हंगामात झालेल्या या पावसामुळे बागायतदारांची चिंता वाढली आहे. काही भागांत विजेचा लपंडावही सुरू झाला आहे.
तर सोलापूर शहरात शनिवारी रात्री अचानक पावसाने दमदार हजेरी लावली. गेल्या काही दिवसांपासून ४२ ते ४३ अंश तापमानाने हैराण झालेल्या सोलापूरकरांना या पावसामुळे मोठा दिलासा मिळाला. वातावरणात गारवा निर्माण झाल्याने नागरिकांनी समाधान व्यक्त केले असून अनेकांनी पावसात भिजण्याचाही आनंद घेतला.
Discussion about this post