नवी दिल्ली । भारतीय अन्न सुरक्षा आणि मानक प्राधिकरणाने (FSSAI) मद्य उद्योगावर मोठी कारवाई करत काही लोकप्रिय रम आणि व्हिस्की ब्रँड्सच्या विशिष्ट उत्पादनांच्या विक्रीवर निर्बंध घातले आहेत. ओल्ड मॉन्क, मॅकडॉवेल्स, बॅगपायपर, अँटिक्विटी ब्ल्यू आणि रॉयल चॅलेंज यांसारख्या प्रसिद्ध ब्रँड्सच्या काही उत्पादनांमध्ये अन्न सुरक्षा आणि लेबलिंग नियमांचे उल्लंघन झाल्याचे आढळल्याचा दावा FSSAI ने केला आहे.
FSSAI च्या तपासणी आणि प्रयोगशाळेतील चाचण्यांमध्ये काही कंपन्या रम आणि व्हिस्कीमध्ये नैसर्गिक प्रक्रियेतून स्वाद विकसित करण्याऐवजी बाह्य किंवा कृत्रिम फ्लेवर मिसळत असल्याचे निदर्शनास आले. नियमानुसार रम व व्हिस्कीचा स्वाद हा कच्चा माल, आंबवणे, ऊर्ध्वपातन आणि परिपक्वता (Aging) या प्रक्रियेतून नैसर्गिकरित्या तयार झाला पाहिजे. मात्र, काही उत्पादक न्यूट्रल अल्कोहोलमध्ये कृत्रिम स्वाद मिसळून ती उत्पादने सामान्य रम किंवा व्हिस्की म्हणून विकत असल्याचा आरोप करण्यात आला आहे.
FSSAI च्या म्हणण्यानुसार, अशा उत्पादनांवर “Rum Flavoured Spirit” किंवा “Whisky Flavoured Spirit” असे स्पष्ट लेबल असणे आवश्यक आहे. मात्र, संबंधित उत्पादनांच्या पॅकेजिंगवर ही माहिती न देता ग्राहकांची दिशाभूल करण्यात आल्याचा आरोपही करण्यात आला आहे.
तपासादरम्यान Old Monk XXX Rum च्या एका व्हेरिएंटवरील “7 Years Old Blended” हा दावा दिशाभूल करणारा असल्याचे FSSAI ने म्हटले आहे. प्रयोगशाळेच्या अहवालानुसार या उत्पादनामध्ये प्रामुख्याने न्यूट्रल स्पिरिट असून, परिपक्व रम स्पिरिटचे प्रमाण ५ टक्क्यांपेक्षा कमी असल्याचे आढळल्याचा दावा करण्यात आला आहे. नियमांनुसार मिश्रणातील सर्वात कमी वयाच्या स्पिरिटच्या आधारेच वयाचा उल्लेख करणे आवश्यक असते.
या मद्यांवर बंदी
प्रयोगशाळेच्या अहवालाच्या आधारे, प्राधिकरणाने मोहन रॉकी स्प्रिंगवॉटरच्या ओल्ड मॉन्क व्हेरिएंट्स, युनायटेड स्पिरिट्सच्या मॅकडॉवेल्स नं. 1 रम, अँटिक्विटी ब्लू व्हिस्की आणि रॉयल चॅलेंज व्हिस्की, इनब्रू बेवरेजेसच्या बॅगपायपर डिलक्स व्हिस्की आणि ओल्ड कास्क डिलक्स XXX रम आणि असोसिएटेड अल्कोहोल अँड ब्रुअरीजच्या सेंट्रल प्रोव्हिन्स व्हिस्की आणि मॅकडॉवेल्स नं. 1 सेलिब्रेशन मॅच्युअर XXX रम यांच्या विक्रीवर बंदी घातली आहे.
Discussion about this post