जळगाव | लाचखोरीच्या प्रकरणात आधीच चौकशीच्या फेऱ्यात असलेले अकोला येथील जिल्हा उपनिबंधक तथा मुद्रांक जिल्हाधिकारी किरण चौधरी यांच्या अडचणीत आणखी भर पडली आहे. एसीबीने सील केलेल्या जळगावातील त्यांच्या घराशी संबंधित कथित चोरीच्या कटप्रकरणी जिल्हापेठ पोलिसांनी किरण चौधरी यांना अटक केली आहे. या कारवाईमुळे महसूल विभागात एकच खळबळ उडाली आहे.
मिळालेल्या माहितीनुसार, काही दिवसांपूर्वी लाचलुचपत प्रतिबंधक विभागाने (एसीबी) चौधरी यांच्याविरुद्ध कारवाई करत जळगावातील त्यांचे निवासस्थान सील केले होते. तपासाच्या अनुषंगाने या घरातील मालमत्ता सुरक्षित ठेवण्यात आली होती.
दरम्यान, मध्यरात्रीच्या सुमारास दोन संशयित युवक सीलबंद घराच्या परिसरात प्रवेश करण्याचा प्रयत्न करत असताना पोलिसांच्या हाती लागले. या घटनेनंतर पोलिसांनी तपासाची चक्रे वेगाने फिरवत दोघांची चौकशी केली. चौकशीत या प्रकारामागे पूर्वनियोजित कट असल्याचा संशय अधिक बळावल्याचे पोलिसांनी सांगितले.
तपासादरम्यान समोर आलेल्या माहितीनुसार, सीलबंद घरातील रोकड आणि मौल्यवान वस्तू बाहेर काढण्यासाठी हा कट रचल्याचा आरोप किरण चौधरी यांच्यावर करण्यात आला आहे. या कटात त्यांचे शालक मनोज झोपे याचीही भूमिका असल्याचे तपासात समोर आल्याचा दावा पोलिसांनी केला आहे.
या प्रकरणी जिल्हापेठ पोलिस ठाण्यात किरण चौधरी आणि मनोज झोपे यांच्याविरुद्ध गुन्हा दाखल करण्यात आला आहे. अटक केल्यानंतर चौधरी यांना न्यायालयात हजर करण्यात आले असता न्यायालयाने त्यांना एक दिवसांची पोलिस कोठडी सुनावली.
दरम्यान, या प्रकरणातील दुसरा आरोपी मनोज झोपे अद्याप फरार असून त्याचा शोध घेण्यासाठी पोलिसांकडून विशेष पथके नियुक्त करण्यात आली आहेत. तपासात आणखी काही धक्कादायक बाबी समोर येण्याची शक्यता पोलिसांनी व्यक्त केली आहे.
लाचखोरीच्या चौकशीदरम्यान सीलबंद करण्यात आलेल्या घराशी संबंधित या नव्या गुन्ह्यामुळे संपूर्ण प्रकरणाला वेगळे वळण मिळाले असून, पुढील तपासाकडे सर्वांचे लक्ष लागले आहे.
Discussion about this post