जळगाव । जळगाव शहरातील तांबापुरा परिसरात शॉर्टसर्किटमुळे दोन दुकानांना भीषण आग लागल्याची घटना घडली. या आगीत जी.एन. टेलर्स आणि अण्णा पंचर या दुकानांचे मोठे नुकसान झाल्याची प्राथमिक माहिती समोर आली आहे. अचानक लागलेल्या आगीमुळे परिसरात एकच खळबळ उडाली असून नागरिकांमध्ये भीतीचे वातावरण निर्माण झाले.
घटनेची माहिती मिळताच जळगाव महानगरपालिकेच्या अग्निशमन विभागाच्या जवानांनी घटनास्थळी धाव घेत आग विझवण्यासाठी शर्थीचे प्रयत्न सुरू केले. आग आटोक्यात आणण्यासाठी अग्निशमन दलाचे कर्मचारी युद्धपातळीवर कार्यरत असून आग इतर दुकानांमध्ये पसरू नये यासाठी विशेष खबरदारी घेतली जात आहे.
दरम्यान, घटनेची माहिती मिळताच जळगाव शहराचे आमदार सुरेश भोळे आणि जळगाव महानगरपालिकेचे आयुक्त आदित्य जीवने यांनी घटनास्थळी भेट देत परिस्थितीची पाहणी केली. त्यांनी संबंधित अधिकाऱ्यांकडून घटनेची माहिती घेत आवश्यक सूचना दिल्या.
या आगीत मोठ्या प्रमाणात आर्थिक नुकसान झाल्याचा प्राथमिक अंदाज व्यक्त करण्यात येत आहे. सुदैवाने या घटनेत कोणतीही जीवितहानी झाल्याची माहिती अद्याप समोर आलेली नाही. आगीचे नेमके कारण आणि नुकसानीचा तपशील अग्निशमन विभाग व संबंधित यंत्रणांच्या पंचनाम्यानंतर स्पष्ट होणार आहे.
Discussion about this post