जळगाव । जळगाव शहरातील रामानंद नगर पोलीस ठाण्याच्या हद्दीत पिंप्राळा हुडको परिसरात सुरू असलेल्या कथित वेश्या व्यवसायावर पोलिसांनी धडक कारवाई केली आहे. पोलिसांनी एका बंगल्यावर छापा टाकून ४ पीडित महिलांची सुटका केली, तर या प्रकरणी ३ संशयित आरोपींना ताब्यात घेतले आहे. या कारवाईमुळे परिसरात खळबळ उडाली आहे.
पोलीस सूत्रांनी दिलेल्या माहितीनुसार, पिंप्राळा हुडको परिसरातील एका बंगल्यात बेकायदेशीरपणे वेश्या व्यवसाय सुरू असल्याची गुप्त माहिती पोलिसांना मिळाली होती. माहितीची खातरजमा करण्यासाठी पोलिसांनी बनावट ग्राहकाच्या माध्यमातून पडताळणी केली. त्यानंतर पोलिसांच्या पथकाने संबंधित बंगल्यावर छापा टाकला.
या कारवाईदरम्यान पोलिसांनी घटनास्थळावरून चार महिलांची सुटका केली असून, वेश्या व्यवसाय चालविल्याच्या संशयावरून तीन जणांना ताब्यात घेण्यात आले आहे. याप्रकरणी रामानंद नगर पोलीस ठाण्यात गुन्हा दाखल करण्याची प्रक्रिया सुरू आहे.
दरम्यान, या कथित रॅकेटमध्ये आणखी कोणाचा सहभाग आहे का, तसेच हा व्यवसाय नेमका किती काळापासून सुरू होता, याचा तपास पोलिसांकडून सुरू आहे. पोलिसांच्या पुढील तपासात या प्रकरणातील आणखी माहिती समोर येण्याची शक्यता आहे.
ही कारवाई प्रभारी उपविभागीय पोलीस अधिकारी सह्याद्री बिर्ले आणि रामानंद नगर पोलीस ठाण्याचे निरीक्षक मधुकर साळवे यांच्या मार्गदर्शनाखाली सहाय्यक पोलीस निरीक्षक माधुरी बोरसे, PSI दिनेश बडगुजर, राजेश पाटील, सहाय्यक फौजदार संजय हिवरकर, भूषण कोल्हे, अनिल पाटील, मनीषा पाटील, राखी खाटीक, हेड कॉन्स्टेबल दीपक पाटील, किरण धनगर, संगपाल तायडे, अमित माळी, तसेच रामानंद नगर पोलीस ठाण्याचे जितेंद्र राजपूत व जितेंद्र राठोड यांच्या पथकाने केली.
Discussion about this post