जळगाव । एमआयडीसी पोलीस ठाण्याच्या हद्दीतील रामेश्वर कॉलनीत झालेल्या तब्बल ३१ लाख २६ हजार ८०० रुपयांच्या घरफोडीचा पोलिसांनी अवघ्या २४ तासांत छडा लावला. सीसीटीव्ही फुटेज आणि गोपनीय माहितीच्या आधारे पोलिसांनी दोन सख्ख्या भावांना ताब्यात घेतले. त्यांच्या ताब्यातून चोरीस गेलेले २०८ ग्रॅम सोन्याचे दागिने आणि २८ ग्रॅम चांदी असा संपूर्ण मुद्देमाल हस्तगत करण्यात आला आहे. विशाल मुरलीधर दाभाडे आणि जितेंद्र मुरलीधर दाभाडे, दोघेही रा. रामेश्वर कॉलनी, अशी अटक करण्यात आलेल्या संशयितांची नावे आहेत.
दर्शनासाठी गेले अन् घर फोडले
रामेश्वर कॉलनीतील रहिवासी संगीता घुगे या कुटुंबीयांसह मध्य प्रदेशातील उज्जैन येथे दर्शनासाठी गेल्या होत्या. याच संधीचा फायदा घेत २७ ते २८ ऑगस्टच्या मध्यरात्री अज्ञात चोरट्यांनी त्यांच्या बंद घराचे कुलूप तोडून घरात प्रवेश केला. चोरट्यांनी घरातील सोन्या-चांदीचे दागिने लंपास केले.घुगे कुटुंबीय दर्शनाहून परतल्यानंतर घरफोडीचा प्रकार उघडकीस आला. त्यानंतर एमआयडीसी पोलीस ठाण्यात गुन्हा दाखल करण्यात आला.
सीसीटीव्हीने दिला धागा
गुन्ह्याचे गांभीर्य लक्षात घेऊन पोलीस अधीक्षक श्रीकांत धिवरे आणि पोलीस निरीक्षक बबन आव्हाड यांच्या मार्गदर्शनाखाली तपासाला वेग देण्यात आला. पीएसआय चंद्रकांत धनके यांच्या पथकाने घटनास्थळासह परिसरातील सीसीटीव्ही फुटेज तपासले तसेच गोपनीय माहितीच्या आधारे संशयितांचा माग काढला.तपासादरम्यान विशाल दाभाडे आणि जितेंद्र दाभाडे या दोघांवर संशय बळावला. पोलिसांनी दोघांना ताब्यात घेऊन कसून चौकशी केली. चौकशीत त्यांनी गुन्ह्याची कबुली दिल्याचे पोलिसांनी सांगितले. त्यानंतर त्यांच्या ताब्यातून चोरीचा संपूर्ण मुद्देमाल हस्तगत करण्यात आला.
सोन्याचे दागिने अन् चांदीचे जोडवे जप्त
पोलिसांनी जप्त केलेल्या मुद्देमालात सोन्याचे गंठन, पाटल्या, विविध डिझाईनच्या अंगठ्या, टॉप्स, नथ तसेच चांदीचे जोडवे यांचा समावेश आहे. एकूण २०८ ग्रॅम सोने आणि २८ ग्रॅम चांदी असा ३१ लाख २६ हजार ८०० रुपयांचा मुद्देमाल पोलिसांच्या हाती लागला आहे.अवघ्या २४ तासांत गुन्ह्याचा छडा लावत चोरीस गेलेला संपूर्ण मुद्देमाल हस्तगत केल्याने एमआयडीसी पोलिसांच्या गुन्हे शोध पथकाच्या कामगिरीचे कौतुक होत आहे. या प्रकरणाचा पुढील तपास एमआयडीसी पोलीस करीत आहेत.
Discussion about this post