मध्यपूर्वेत सुरू असलेल्या भीषण युद्धाच्या पार्श्वभूमीवर इस्त्रायलचे पंतप्रधान बेंजामिन नेतान्याहू यांच्या अडचणीत आता आंतरराष्ट्रीय स्तरावर मोठी वाढ झाली आहे. हंगेरीचे नवनियुक्त पंतप्रधान पीटर मॅग्यार यांनी नेतान्याहू यांच्या संदर्भात केलेल्या एका खळबळजनक विधानामुळे जागतिक राजकारणात मोठी खळबळ उडाली आहे.
हंगेरीत पाऊल ठेवताच अटकेची टांगती तलवार
आंतरराष्ट्रीय गुन्हेगारी न्यायालयाने (ICC) नेतान्याहू यांच्या विरोधात आधीच अटक वॉरंट जारी केले आहे. यावर भाष्य करताना हंगेरीचे पंतप्रधान पीटर मॅग्यार यांनी स्पष्ट केले की, “हंगेरी हा आयसीसीचा सदस्य देश आहे. जर आयसीसीचे अटक वॉरंट असलेली कोणतीही व्यक्ती हंगेरीची सीमा ओलांडत असेल, तर तिला तात्काळ अटक केली जाईल.” विशेष म्हणजे, यापूर्वी इस्त्रायली पंतप्रधानांना हंगेरी दौऱ्याचे आमंत्रण देण्यात आले होते, मात्र आता मॅग्यार यांच्या विधानामुळे नेतान्याहू यांच्यासाठी युरोपचे दरवाजे बंद होताना दिसत आहेत.
२८ फेब्रुवारीचा तो ‘मोठा’ हल्ला आणि युद्धाचा भडका
२८ फेब्रुवारी २०२६ रोजी इस्त्रायल आणि अमेरिकेने इराणवर मोठा हल्ला चढवला होता. या हल्ल्याचे पडसाद उमटत असून इराणनेही आता इस्त्रायलच्या मोठ्या शहरांना लक्ष्य करण्यास सुरुवात केली आहे. इराण माघार घेण्यास तयार नसल्याने हे युद्ध आता निर्णायक टप्प्यावर पोहोचले आहे. अमेरिकेने इस्त्रायलच्या पाठिंब्यासाठी हा हल्ला केल्याचा आरोप जगभरातून होत असून, या युद्धामुळे संपूर्ण जगावर संकट ओढवले आहे.
जगातील अनेक बड्या देशांनी या युद्धात मध्यस्थी करण्याचा आणि शांतता प्रस्थापित करण्याचा प्रयत्न केला. मात्र, दोन्ही बाजू आपल्या भूमिकेवर ठाम असल्याने अद्याप कोणालाही यश आलेले नाही.
Discussion about this post