लॉरेन्स बिश्नोई गँगचा पुन्हा धुमाकूळ! ५ सेकंदात १० गोळ्या झाडून जिम मालकाची हत्या, गोळीबाराचा थरार कॅमेऱ्यात कैद

हरियाणाच्या हांसी जिल्ह्यातील फव्वारा चौक परिसरात एका अत्यंत धक्कादायक आणि थरारक घटनेत अज्ञात हल्लेखोरांनी एका जिम मालकाची भररस्त्यात गोळ्या झाडून निर्घृण हत्या केली. हल्लेखोराने अवघ्या ५ सेकंदात १० गोळ्या झाडल्याची माहिती समोर आली आहे. या भीषण गोळीबारात जिम मालकाचा जागीच मृत्यू झाला असून, या हत्येची जबाबदारी कुख्यात लॉरेन्स बिश्नोई गँगने घेतली आहे. या घटनेमुळे संपूर्ण परिसरात भीतीचे आणि दहशतीचे वातावरण पसरले आहे.

मिळालेल्या माहितीनुसार, कपिल असे मृत जिम मालकाचे नाव आहे. गुरुवारी सकाळी ६ वाजेच्या सुमारास फव्वारा चौकाजवळील एका दुकानापाशी कपिल हा काही तरुण-तरुणींना व्यायाम करून घेत होता. त्याच वेळी दुचाकीवरून आलेल्या हेल्मेटधारी हल्लेखोरांनी अत्यंत जवळून कपिलवर अंधाधुंद गोळीबार सुरू केला. अवघ्या ५ सेकंदात त्याच्या पाठीत आणि डोक्यात १० गोळ्या झाडण्यात आल्या. या हल्ल्यात कपिलचा जागीच मृत्यू झाला, तर तिथे व्यायाम करत असलेली एक तरुणीही गोळी लागल्याने जखमी झाली आहे. तिच्यावर सध्या एका खासगी रुग्णालयात उपचार सुरू आहेत.

CCTV :A horrific incident occurred early this morning near Fawwara Chowk in Hansi, Haryana. Unidentified assailants fired ten rounds at gym owner Kapil from close range, killing him on the spot. A young woman present at the scene was also injured and is undergoing treatment.… pic.twitter.com/777Aj2wq9T

— Dharm (@dhram00) June 11, 2026

लॉरेन्स बिश्नोई गँगकडून जबाबदारीचा ऑडिओ जारी
या हत्येनंतर संपूर्ण गुन्हेगारी जगतात खळबळ उडाली आहे. लॉरेन्स बिश्नोई टोळीचा गुंड हरि बॉक्सर याने एक ऑडिओ क्लिप शेअर करून या हत्येची जबाबदारी स्वीकारली आहे. त्यामुळे या प्रकरणाला आता राजकीय आणि गंभीर वळण मिळाले आहे.

घटनेची माहिती मिळताच पोलिसांच्या वरिष्ठ अधिकाऱ्यांसह विशेष पथकाने घटनास्थळी धाव घेतली. पोलिसांनी दिलेल्या प्राथमिक माहितीनुसार, हा हल्ला पूर्व वैमनस्यातून झाला असण्याची शक्यता आहे. मात्र, अद्याप ठोस पुरावे पोलिसांच्या हाती लागलेले नाहीत. पोलिसांनी परिसरातील सीसीटीव्ही (CCTV) कॅमेऱ्यांचे फुटेज जप्त केले असून प्रत्यक्षदर्शींची चौकशी सुरू केली आहे.