जळगाव । जिल्हा दूध संघातील कार्यक्रमात मंत्री गुलाबराव पाटील यांनी आपल्या खास शैलीत जोरदार फटकेबाजी करत राजकीय टोलेबाजी केली. व्यासपीठावर भाजपचे आमदार तथा जिल्हा दूध संघाचे अध्यक्ष मंगेश चव्हाण उपस्थित असताना गुलाबराव पाटील यांनी दूध संघ, सहकार आणि साखर कारखान्यांच्या मुद्द्यावरून चव्हाणांना मिश्कील टोले लगावले. त्यांच्या काही वक्तव्यांमुळे कार्यक्रमस्थळी उपस्थितांमध्ये चांगलीच चर्चा रंगली.
जळगाव जिल्हा दूध संघाचे संस्थापक अध्यक्ष आणि माजी गृहराज्यमंत्री स्व. जे. टी. महाजन यांच्या स्मारकाच्या लोकार्पण सोहळ्याप्रसंगी गुलाबराव पाटील बोलत होते. जे. टी. महाजन हे उच्चशिक्षित, साधे व्यक्तिमत्त्व होते. त्यांची नाळ शेतीशी जोडलेली असल्याने त्यांनी साखर कारखाना आणि सहकारी संस्थांचे मोठे जाळे उभे केले, असे पाटील यांनी सांगितले.
दूध संघाची तिजोरी आणि कारभाराचा संदर्भ देत गुलाबराव पाटील यांनी मंगेश चव्हाण यांना उद्देशून मिश्कील टोला लगावला. “जिल्हा दूध संघाच्या तिजोरीच्या चाव्या आपल्याकडे आहेत. दूध संघ चांगला चालवा, कार्यक्रम केला तर कार्यक्रम होतील,” अशा शब्दांत त्यांनी चव्हाणांना सुनावले. सहकार क्षेत्रातील साखर कारखाने अडचणीत येत असताना खासगी कारखाने मात्र सुरू राहतात, यावरही पाटील यांनी भाष्य केले. “सहकार विभागाचे साखर कारखाने बंद पडतात आणि खासगी कारखाने चालतात. मंगेश दादांचा खासगी कारखाना कसा चालत होता?” असा सवाल करत त्यांनी उपस्थितांचे लक्ष वेधले.
तुकाराम मुंढेंचे कौतुक
दूध संघाच्या कामकाजात अधिकारी तुकाराम मुंढे यांच्यासारखे अधिकारी आल्याने दूध संकलन वाढल्याचे गुलाबराव पाटील यांनी सांगितले. “आपलं दूध संघात येणारं दूध वाढलं, पनीर कुठेच मिळत नाही,” असे म्हणत त्यांनी दूध संघाच्या कामकाजातील सुधारणा आणि तुकाराम मुंढे यांच्या भूमिकेचे कौतुक केले.
यावेळी गुलाबराव पाटील यांच्या एका विधानाने विशेष चर्चा रंगली. “मी भोळा राहिलो तर मला भाजपवाले खाऊन जातील,” असे ते म्हणाले. आपल्या मिश्कील शैलीत त्यांनी पुढे, “माझ्या तोंडातून काहीही निघतं आणि बोललं जातं. मग हे टीव्हीवाले काहीही दाखवतात. त्यामुळे आता मी सांभाळून बोलतो,” असेही सांगितले.मात्र, त्याआधीच केलेल्या या विधानामुळे सभागृहात हशा आणि चर्चेचे वातावरण निर्माण झाले.
Discussion about this post