गणेशोत्सवाआधी FDA ची धडक कारवाई; जळगाव-पाचोऱ्यात ४.३६ लाखांचा संशयित खाद्यसाठा जप्त

जळगाव । गणेशोत्सवाच्या पार्श्वभूमीवर बाजारात विक्री होणाऱ्या खाद्यपदार्थांच्या गुणवत्तेवर अन्न व औषध प्रशासनाने (FDA) करडी नजर ठेवली आहे. नागरिकांच्या आरोग्याला धोका निर्माण होऊ नये, यासाठी जळगाव शहर आणि पाचोरा येथे करण्यात आलेल्या तपासणीत तब्बल ९२३.४ किलो संशयित खाद्यपदार्थांचा साठा जप्त करण्यात आला आहे. जप्त केलेल्या मालाची एकूण किंमत ४ लाख ३६ हजार २२२ रुपये आहे.

आयुक्त तुकाराम मुंढे यांच्या निर्देशानुसार ही कारवाई करण्यात आली. जळगाव शहरातील एका ठिकाणी गुजरातमधून आणलेला संशयास्पद प्रोप्रायटरी फूडचा मोठा साठा आढळून आला. या पदार्थाचा वापर मिठाई तयार करण्यासाठी केला जात असल्याचा संशय प्रशासनाने व्यक्त केला आहे.

गुजरातमधून आणलेला ३७० किलो साठा ताब्यात

अन्न सुरक्षा अधिकारी अमोल जगताप यांच्या पथकाने जळगाव शहरातील अग्रवाल वेफर्स आणि नमकीन येथे तपासणी केली. यावेळी गुजरातमधून मागविण्यात आलेले ३७० किलो प्रोप्रायटरी फूड आढळले. या साठ्याची किंमत ९३ हजार २० रुपये असल्याचे प्रशासनाने सांगितले.

या पदार्थाचा रंग, पोत आणि स्वरूप खवा किंवा बर्फीसदृश असल्याचे तपासणीदरम्यान निदर्शनास आले. त्यामुळे पारंपरिक खवा आणि दुधापासून तयार होणाऱ्या मिठाईऐवजी या पदार्थाचा वापर केला जातो का, याचा तपास प्रशासनाकडून सुरू आहे. या साठ्यातून नमुने घेण्यात आले असून ते प्रयोगशाळा तपासणीसाठी पाठविण्यात आले आहेत. अहवाल प्राप्त झाल्यानंतर पुढील कारवाई केली जाणार आहे.

पाचोऱ्यातही मोठा साठा जप्त

जळगावनंतर FDA च्या पथकाने पाचोरा शहरातील दोन ठिकाणी तपासणी केली. या कारवाईत बनावट खव्याचा संशयित साठा आढळून आला. सुमारे २ हजार ५०० रुपये किमतीचा हा साठा नियमानुसार नष्ट करण्यात आला.

याच कारवाईत १७४.२ किलो संशयित तूप जप्त करण्यात आले. या तुपाची किंमत १ लाख ३२ हजार ३९२ रुपये आहे. त्यासोबतच तब्बल ३७९.२ किलो क्रीम जप्त करण्यात आले असून त्याची किंमत २ लाख ८ हजार ५६० रुपये असल्याचे प्रशासनाने सांगितले.

नमुने तपासणीसाठी; अहवालानंतर पुढील कारवाई

जप्त करण्यात आलेल्या तूप, क्रीम आणि इतर संशयित खाद्यपदार्थांचे नमुने घेण्यात आले आहेत. हे पदार्थ अन्न सुरक्षा निकषांनुसार योग्य आहेत की नाही, याची प्रयोगशाळेत तपासणी केली जाणार आहे. अहवालाच्या आधारे संबंधितांवर पुढील कायदेशीर कारवाई केली जाणार असल्याचे FDA कडून स्पष्ट करण्यात आले.

सहाय्यक आयुक्त दिनानाथ शिंदे यांच्या मार्गदर्शनाखाली ही कारवाई करण्यात आली. अन्न सुरक्षा अधिकारी अमोल जगताप आणि त्यांच्या पथकाने तपासणीची कार्यवाही केली. गणेशोत्सवाच्या काळात मिठाई आणि इतर खाद्यपदार्थांची मोठ्या प्रमाणात विक्री होत असल्याने अशा प्रकारच्या तपासण्या आणखी तीव्र होण्याची शक्यता आहे.