तमिळनाडूचे मुख्यमंत्री जोसेफ विजय यांच्या नावाने फेक अकाउंट; चेन्नई पोलिसांचा नशिराबादेत छापा!

जळगाव । तमिळनाडूचे मुख्यमंत्री जोसेफ विजय यांच्या नावाचा गैरवापर करून सोशल मीडियावर बनावट अकाउंट तयार केल्याच्या कथित प्रकरणाची चौकशी आता जळगाव जिल्ह्यात पोहोचली आहे. या प्रकरणाचा तपास करण्यासाठी चेन्नई पश्चिम विभागातील सायबर गुन्हे पोलिसांचे पथक आज मंगळवारी नशिराबाद येथे दाखल झाले असून पथकाने होमगार्ड मोहम्मद जुनेद शेख कुतुबुद्दीन याला चौकशीसाठी ताब्यात घेतले असल्याची माहिती समोर आलीय.

काय आहे प्रकरण?

मुख्यमंत्री जोसेफ विजय यांच्या नावाने किंवा त्यांच्या ओळखीचा आभास निर्माण करणारे सोशल मीडिया अकाउंट तयार करण्यात आल्याचा संशय चेन्नई सायबर पोलिसांना आहे. या अकाउंटवरून एआयच्या माध्यमातून तयार केलेले व्हिडिओ, डिजिटल फोटो तसेच विविध पोस्ट प्रसारित करण्यात आल्याचे तपासात समोर आल्याचे सांगण्यात येते. संबंधित अकाउंट नेमके कोणी तयार केले, त्याचे संचालन कोण करत होते आणि ही डिजिटल सामग्री कोणत्या उद्देशाने प्रसारित करण्यात आली, याचा शोध पोलिसांकडून घेतला जात आहे. याप्रकरणी तमिळनाडूमध्ये गुन्हा दाखल करण्यात आला आहे.

तपासादरम्यान पोलिसांकडून सोशल मीडिया अकाउंटचे आयपी लॉग, लिंक्ड अकाउंट्स, ई-मेल आयडी, मोबाईल क्रमांक, सबस्क्रायबर तपशील तसेच वापरण्यात आलेल्या डिजिटल उपकरणांची माहिती तपासली जात आहे. अकाउंट कोणत्या ठिकाणाहून आणि कोणत्या उपकरणाद्वारे हाताळण्यात आले, त्यावरून किती सामग्री प्रसारित करण्यात आली, याचाही तांत्रिक तपास सुरू आहे. या डिजिटल पुराव्यांच्या आधारे प्रकरणातील संशयितांची भूमिका स्पष्ट होण्याची शक्यता आहे.

नशिराबाद येथील होमगार्ड मोहम्मद जुनेद शेख याचा या प्रकरणातील नेमका सहभाग अद्याप स्पष्ट झालेला नाही. त्याने बनावट अकाउंट तयार केले होते का, त्याचे संचालन केले होते का किंवा डिजिटल सामग्रीच्या प्रसारणात त्याची भूमिका होती का, याबाबत सायबर पोलिसांकडून चौकशी केली जात आहे. तसेच या प्रकरणात आणखी कोणाचा सहभाग आहे का, याचाही तपास सुरू आहे. चेन्नईतील सायबर पोलिसांचे पथक थेट नशिराबादमध्ये दाखल झाल्याने या प्रकरणाची स्थानिक पातळीवरही चर्चा सुरू झाली आहे.

बनावट अकाउंटच्या माध्यमातून एआय तंत्रज्ञानाचा वापर करून तयार केलेली सामग्री कोणत्या उद्देशाने प्रसारित करण्यात आली, त्यामागे एक व्यक्ती आहे की आणखी काही जणांचा सहभाग आहे, याचा उलगडा तपासातून होण्याची शक्यता आहे. संशयिताला जळगाव न्यायालयात हजर करून ताबा मिळविण्याची कायदेशीर प्रक्रिया पूर्ण झाल्याने आता पुढील तपासात कोणते पुरावे समोर येतात, याकडे लक्ष लागले आहे.