आफ्रिकेतील काही देशांमध्ये थैमान घालणाऱ्या जीवघेण्या ‘इबोला’ विषाणूने आता भारताची चिंता वाढवली आहे. गुजरात मधील अहमदाबाद येथे एका ३७ वर्षीय व्यावसायिकाला इबोला सदृश लक्षणे आढळल्याने आरोग्य यंत्रणेत प्रचंड खळबळ उडाली आहे. या रुग्णाची गंभीर पार्श्वभूमी पाहता त्याला तातडीने विशेष आयसोलेशन वॉर्डात दाखल करण्यात आले असून, देशातील आरोग्य यंत्रणा हायअलर्टवर आली आहे.
संबंधित व्यावसायिक हा या महिन्याच्या सुरुवातीला आफ्रिकेतील काँगो देशातून भारतात परतला होता. भारतात आल्यानंतर सर्वात आधी तो मुंबईत आला. तिथे पाच दिवस राहिल्यानंतर त्याने सिल्व्हासा, दमण आणि २२ मे रोजी बडोदा असा प्रवास केला. २६ मे रोजी त्याला अचानक तीव्र सर्दी आणि तापाची लक्षणे जाणवू लागली. त्याची ट्रॅव्हल हिस्ट्री (प्रवास पार्श्वभूमी) तपासून डॉक्टरांनी त्याला तात्काळ अहमदाबाद येथे पुढील उपचारासाठी हलवले. खबरदारीचा उपाय म्हणून या व्यापाऱ्याच्या संपर्कात आलेल्या इतर ३ व्यक्तींनाही अहमदाबादमधील वेगवेगळ्या रुग्णालयांत भरती करण्यात आले आहे.
या धक्कादायक घटनेबाबत माहिती देताना गुजरातचे आरोग्यमंत्री प्रफुल्ल पानशेरिया म्हणाले, “रुग्णाला तज्ज्ञ डॉक्टरांच्या देखरेखीखाली ठेवण्यात आले असून त्याच्या रक्ताचे नमुने प्रयोगशाळेत तपासणीसाठी पाठवण्यात आले आहेत. या तपासणीचा अंतिम अहवाल आल्यानंतरच त्याला नेमका कोणता संसर्ग झाला आहे, हे स्पष्ट होईल.”
दरम्यान, राष्ट्रीय आरोग्य विभागाने अद्याप भारतात इबोला विषाणूच्या संसर्गाच्या कोणत्याही प्रकरणाला अधिकृत दुजोरा दिलेला नाही. ही केवळ प्राथमिक लक्षणे असून खबरदारीचा उपाय म्हणून सर्व प्रोटोकॉल पाळले जात आहेत. नागरिकांनी सोशल मीडियावरील कोणत्याही अफवांवर विश्वास ठेवू नये आणि घाबरून न जाता सतर्क राहावे, असे आवाहन प्रशासनाने केले आहे.
Discussion about this post