मुंबई । भ्रष्टाचारांचे आरोप आणि राजीनाम्याच्या मागणीमुळं अडचणीत आलेले राज्याचे मंत्री धनंजय मुंडे यांचा पाय आणखी खोलात गेला आहे. वांद्रे कौटुंबिक न्यायालयानं धनंजय मुंडे यांना करुणा शर्मा यांना महिना पोटगीपोटी 2 लाख रुपये देण्याचे आदेश दिले आहेत.
करुणा शर्मा यांनी धनंजय मुंडे यांच्या विरोधात कौटुंबिक हिंसाचाराची तक्रार केली होती. या तक्रारीच्या आधारावर वांद्रे कौटुंबिक न्याायलयात सुनावणी सुरू होती. करुणा मुंडे यांनी केलेल्या आरोपांनंतर झालेल्या सुनावणीनंतर न्यायालयाने धनंजय मुंडे यांना कौटुंबिक हिंसाचार प्रकरणात दोषी ठरवलं आहे.
न्यायालयाच्या या निकालानंतर करुणा शर्मा यांनी प्रतिक्रिया देताना म्हटलं, न्यायलयाचे मी मनापासून आभार मानते. माझ्यासोबत मुलं सुद्धा असल्याने आम्हाला 15 लाख रुपये दरमहा देण्याची मागणी केली होती. पण न्यायालयाने 2 लाख रुपये प्रति महा देण्याचे आदेश दिले आहेत. त्यामुळे 15 लाख रुपयांची पोटगी मिळावी यासाठी आता मी पुन्हा हायकोर्टात जाणार आहे.मंत्रिपदावर असलेल्या व्यक्तीसोबत माझी लढाई सुरू होती. बीडपासून मला न्यायालयात यावे लागते. तीन ते पाच महिन्यांनी तारीख पुढे जात होती. ही लढाई मी आता जिंकली आहे असंही करुणा शर्मा म्हणाल्या.
कोर्टाच्या निकालपत्रात नेमकं काय?
धनंजय मुंडे यांनी कौटुंबिक हिंसाचार केल्याचं कोर्टाकडून अंशत: मान्य
करुणा मुंडे या पोटगीसाठी पात्र आहेत असंही कोर्टाने म्हटलं आहे.
करुणा शर्मा – मुंडे यांना पोटगी म्हणून दर महिन्याला 1 लाख 25 हजार रुपये देण्यात यावे. तर मुलगी शिवानीला तिच्या लग्नापर्यंत महिन्याला 75 हजार रुपये देण्यात यावेत.
यासोबतच अर्ज दाखल केल्याच्या तारखेपासून पोटगी देण्याचे आदेशही कोर्टाने दिले आहेत.
9 जानेवारी 1998 मध्ये धनंजय आणि करुणा यांचा आंतरजातीय प्रेमविवाह झाला. 2018 पर्यंत वैवाहिक आयुष्य सुरळीत सुरू होते.
2018 नंतर धनंजय मुंडेंच्या वागण्यात अचानक बदल झाला आणि त्यांनी करुणा मुंडेंकडे दुर्लक्ष करण्यास सुरुवात केली.
धनंजय मुंडे यांनी राजश्री यांच्यासोबत दुसरा विवाह केला.
पोटगीच्या अर्जाचा खर्च म्हणून धनंजय मुंडे यांनी 25 हजार रुपये द्यावेत असेही आदेश न्यायालयाने दिले आहेत.
Discussion about this post