जळगाव : दूध म्हणजे आरोग्यासाठी पोषक पदार्थ; मात्र याच दुधात भेसळ करून ग्राहकांच्या आरोग्याशी खेळण्याचा प्रकार अमळनेर तालुक्यात समोर आला आहे. गायीच्या दुधाची फॅट वाढवण्यासाठी त्यात सोयाबीन तेल मिसळले जात होते आणि हे भेसळयुक्त दूध चक्क ‘म्हशीचे दूध’ म्हणून धुळे शहरात विक्रीसाठी पाठवले जात होते. जानवे येथे अन्न व औषध प्रशासन आणि अमळनेर पोलिसांनी संयुक्त कारवाई करत हा प्रकार उघडकीस आणला.
जानवे ते इंदापिंप्री रस्त्यावरील पत्र्याच्या शेडमध्ये गोठ्याच्या आड हा प्रकार सुरू असल्याची माहिती पथकाला मिळाली होती. या माहितीच्या आधारे रविवारी (३० ऑगस्ट) दुपारी साडेतीनच्या सुमारास पथकाने अचानक छापा टाकला. त्यावेळी महेश दिलीप पाटील (२७, रा. जानवे) हा गायीच्या दुधात सोयाबीन तेल मिसळताना आढळून आला.
१०० लिटर दुधात भेसळीचा खेळ
तपासात भेसळ करण्याची पद्धत समोर आली. १० लिटर भेसळयुक्त दूध तयार करून ते १०० लिटर गायीच्या दुधात मिसळले जात होते. त्यानंतर या दुधाला म्हशीचे दूध असल्याचे भासवून धुळे शहरात विक्रीसाठी पाठवले जात असल्याचे समोर आले. कारवाईदरम्यान पथकाने ४ हजार ३२० रुपयांचा मुद्देमाल जप्त केला. अन्न व औषध प्रशासनाचे अधिकारी आकाश कैलास बोऱ्हाडे (३०) यांनी दिलेल्या फिर्यादीवरून अमळनेर पोलिस ठाण्यात संबंधित कायद्यांनुसार गुन्हा दाखल करण्यात आला आहे.
पोलिसांनी गुन्हा दाखल केल्यानंतर काही तासांतच महेश पाटील याला अटक केली. अमळनेर पोलिस ठाण्याचे पोलिस उपनिरीक्षक नामदेव बोरकर या प्रकरणाचा पुढील तपास करीत आहेत.
Discussion about this post