मुंबई । राज्यात महिलांसह मुलीवर होणाऱ्या अत्याचाराच्या घटना काही केल्या थांबत नसून यातच बाप- लेकीच्या नात्याला काळीमा फासणारी धक्कादायक घटना मुंबईजवळील नालासोपारामधून समोर आली आहे. एका नराधम बापानेच आपल्या २२ वर्षीय मुलीवर सातत्याने अत्याचार केला आहे. मुलीच्या मृत्यूनंतर तिच्या आईने धाडस दाखवून पोलिसांत तक्रार दिल्यानंतर गुन्हा दाखल करण्यात आला आहे.
पोलिसांनी दिलेल्या माहितीनुसार, तीन महिन्यांपासून क्षयरोगाने त्रस्त असलेली पीडित तरुणी नालासोपारा पश्चिममध्ये आपल्या वडीलांसह वास्तव्यास होती. याची नराधम बापाला माहिती असूनही तिच्यावर तो सातत्याने अत्याचार करत होता. धक्कादायक म्हणजे तरुणीची प्रकृती ढासळत असतानाही हा प्रकार सुरूच होता. गंभीर आजाराने त्रस्त आणि नराधम बापाचा अत्याचार सहन करणाऱ्या या पीडित तरुणीला ११ नोव्हेंबर रोजी जे जे रुग्णालयातील अतिदक्षता विभागात उपचारासाठी दाखल करण्यात आले होते. मात्र उपचारादरम्यान तिचा मृत्यू झाला. त्यानंतर या घटनेला वाचा फूटली.
दरम्यान, नराधम बाप पीडितेला बळजबरीने घरात डांबून ठेवून मारहाणही करत होता. तसेच हा प्रकार कोणालाही सांगितला तर जिवे मारण्याची धमकी दिली होती. या धमकीमुळे पीडित तरुणी आणि तिची आई भीतीपोटी याची कुठे वाच्छता केली नाही. मात्र हे प्रकार थांबण्याचे नाव घेत नव्हते. याकाळात पीडीत तरुणी गर्भवती झाली होती. मात्र त्याने बळजबरीने तिचा गर्भपातही केला होता
मात्र मुलीच्या मृत्यूनंतर तिच्या आईने आपल्या मुलीला न्याय मिळावा यासाठी नालासोपारा पोलिसांकडे अत्याचाराची तक्रार केली. नराधम बापाच्या मारहाण आणि शारीरिक अत्याचारामुळेच मुलीचा मृत्यू झाल्याचा आरोप तिच्या आईने केला आहे. या प्रकरणी नालासोपारा पोलिसांनी आरोपी बापावर विविध कलमाअन्वये गुन्हे दाखल केले असून त्याला अटक करण्याची प्रक्रिया सुरू आहे.
Discussion about this post