मुंबई । राज्याच्या वातावरणात बदल होत असल्याचे पाहायला मिळत आहे. कुठे उन्हाचा चटका तर कुठे थंडीचा गारवा असा अनुभव नागरिकांना येत आहे. यात आता हवामान खात्याने राज्यात पावसाची शक्यता वर्तविली आहे. सिंधुदुर्ग आणि कोल्हापूर जिल्ह्यांत जोरदार वारे, विजांसह पावसाचा इशारा हवामान विभागाने दिला आहे.
कोकण किनारपट्टीवर 3 दिवस मेघ गर्जनेसह पावसाचा इशारा हवामान विभागाने दिला आहे. बंगालच्या उपसागरावरून येणाऱ्या वाऱ्याचा वेग वाढला आहे. त्यामुळे पुढील 3 दिवस गोवा आणि दक्षिण कोकण किनारपट्टीवर मेघगर्जनेसह हलक्या पावसाची शक्यता हवामान विभागाने वर्तवली आहे.
राज्यातील तापमानात मागील काही दिवसांपासून चढ उतार होत आहेत. सातारा आणि सांगली या जिल्ह्यांमध्ये काही ठिकाणी हलक्या सरी पडतील, असाही अंदाज हवामान विभागाने दिला होता.
त्यानुसार कराड तालुक्यात मध्यरात्रीपासून अवकाळी पावसाला सुरुवात झाली आहे. या पावसामुळे ऊसतोडीवर परिणाम झाला आहे. मात्र हा पाऊस रब्बी पिकांसाठी पोषक असल्याने शेतकऱ्यांच्यातून समाधान व्यक्त होत आहे.
