जळगाव । जळगाव जिल्हा मध्यवर्ती सहकारी बँकेच्या निवडणुकीवरून महायुतीतील वाद आता चव्हाट्यावर आला आहे. महायुतीच्या पदाधिकारी मेळाव्यात भाजप आमदार मंगेश चव्हाण यांनी केलेल्या वक्तव्यावर पाचोऱ्याचे आमदार किशोर पाटील यांचे पुत्र सुमित पाटील चांगलेच संतापले. त्यांनी मंगेश चव्हाण यांना ‘गांडू, नामर्द माणूस’ असे म्हणत आक्रमक शब्दांत टीका केली. यानंतर चव्हाण यांनीही पलटवार करत थेट किशोर पाटील यांच्याशी बोलणार असल्याचे सांगितले.
जळगाव शहरात गुरुवारी झालेल्या महायुतीच्या मेळाव्यात मंगेश चव्हाण यांनी सुमित पाटील यांच्या उमेदवारी अर्जाच्या प्रक्रियेबाबत भाष्य केले होते. त्यांच्या वक्तव्यामुळे नाराज झालेल्या सुमित पाटील यांनी पत्रकारांशी बोलताना चव्हाण यांच्यावर निशाणा साधला. मला बिनविरोध केल्याचा आव आणू नये, असेही त्यांनी सुनावले.
चव्हाणांचा सुमित पाटलांना पलटवार
सुमित पाटील यांच्या टीकेनंतर मंगेश चव्हाण यांनीही प्रतिक्रिया दिली. सुमित पाटील यांनी आपल्याला नामर्द कशावरून म्हटले, हे त्यांनाच माहीत असल्याचे सांगत त्यांनी नाराजी व्यक्त केली. सुमित पाटील हे वयाने लहान असल्याने त्यांच्याशी थेट बोलण्याऐवजी त्यांचे वडील आमदार किशोर पाटील यांच्याशीच बोलेन, असे चव्हाण म्हणाले. तसेच किशोर पाटील यांनी आपल्या मुलाला आवर घालावा, असा टोलाही त्यांनी लगावला.
जिल्हा बँकेच्या निवडणुकीतील बिनविरोध निवडीचे श्रेय आणि उमेदवारी अर्जाच्या प्रक्रियेवरून सुरू झालेला हा वाद आता वैयक्तिक टीकेपर्यंत पोहोचला आहे. त्यामुळे महायुतीतील अंतर्गत मतभेद पुन्हा एकदा उघड झाले असून, या राजकीय संघर्षाची जिल्ह्यात जोरदार चर्चा सुरू आहे.















Discussion about this post