पालघर जिल्ह्याच्या राजकारणात मोठी राजकीय उलथापालथ झाली आहे. शिवसेनेच्या शिंदे गटाचे माजी आमदार श्रीनिवास वनगा यांनी भाजपमध्ये प्रवेश केला आहे. भाजप प्रदेशाध्यक्ष रवींद्र चव्हाण यांच्या उपस्थितीत त्यांनी भाजपचे कमळ हाती घेतले. वनगा यांच्या या पक्षप्रवेशामुळे शिंदे गटाला मोठा धक्का बसल्याची चर्चा राजकीय वर्तुळात सुरू झाली आहे.
भाजप प्रदेशाध्यक्ष रवींद्र चव्हाण हे खासदार क्रीडा महोत्सवाच्या कार्यक्रमानिमित्त पालघर दौऱ्यावर आले होते. याच दौऱ्यादरम्यान श्रीनिवास वनगा यांनी भाजपमध्ये प्रवेश करण्याचा निर्णय घेतला. त्यांच्या या निर्णयामुळे पालघर जिल्ह्यात भाजपची राजकीय ताकद वाढण्याची शक्यता व्यक्त केली जात आहे. तसेच जिल्ह्यातील महायुतीमधील राजकीय समीकरणांवरही याचा परिणाम होण्याची शक्यता आहे.
विधानसभा निवडणुकीनंतर शिंदे गटावर होते नाराज?
२०२४ च्या विधानसभा निवडणुकीनंतर श्रीनिवास वनगा हे शिंदे गटावर नाराज असल्याची चर्चा राजकीय वर्तुळात रंगली होती. निवडणुकीच्या काळात त्यांच्या भूमिकेमुळे पक्षांतर्गत मतभेदही समोर आले होते. त्यांनी बंडखोरीची भूमिका घेतल्याने राजकीय वातावरण तापले होते. त्यानंतर ते पक्षाच्या सक्रिय घडामोडींपासून काहीसे दूर असल्याचे दिसून आले. त्यांच्या पुढील राजकीय वाटचालीबाबत अनेक तर्कवितर्क लावले जात होते. अखेर त्यांनी भाजपमध्ये प्रवेश करून या चर्चांना पूर्णविराम दिला आहे.
शिंदे गटाला धक्का, भाजपची ताकद वाढणार?
श्रीनिवास वनगा यांच्या भाजप प्रवेशामुळे पालघर जिल्ह्यातील राजकीय समीकरणांमध्ये बदल होण्याची शक्यता आहे. विशेषतः शिंदे गटासाठी हा मोठा राजकीय धक्का मानला जात आहे. दुसरीकडे, वनगा यांच्यासारख्या माजी आमदाराच्या प्रवेशामुळे भाजपला जिल्ह्यात संघटनात्मक आणि राजकीय बळ मिळू शकते.
आता भाजपमध्ये श्रीनिवास वनगा यांना कोणती जबाबदारी दिली जाणार, तसेच त्यांच्या प्रवेशाचा शिंदे गटासह इतर पक्षांच्या राजकारणावर काय परिणाम होणार, याबाबत उत्सुकता निर्माण झाली आहे. पालघरच्या राजकारणात या पक्षांतराचे पडसाद आगामी काळात कसे उमटतात, हे पाहणे महत्त्वाचे ठरणार आहे.















Discussion about this post