संरक्षण क्षेत्रात नोकरी करण्याची इच्छा असलेल्या तरुणांसाठी महत्त्वाची संधी उपलब्ध झाली आहे. आसाम रायफल्सने टेक्निकल आणि ट्रेड्समन भरती रॅली २०२६ अंतर्गत ३५४ रिक्त पदांसाठी भरती प्रक्रिया जाहीर केली आहे. या भरतीत तांत्रिक तसेच बिगर तांत्रिक पदांचा समावेश असून, १०वी, १२वी उत्तीर्णांसह आयटीआय आणि डिप्लोमा धारक उमेदवारांनाही अर्ज करता येणार आहे.
या भरतीसाठी ऑनलाइन अर्ज प्रक्रिया १५ नोव्हेंबर २०२६ पासून सुरू झाली आहे. इच्छुक आणि पात्र उमेदवारांना १४ डिसेंबर २०२६ रोजी रात्री ११ वाजून ५९ मिनिटांपर्यंत अर्ज सादर करता येणार आहे. डायरेक्टोरेट जनरल आसाम रायफल्स, शिलाँग यांच्या माध्यमातून ही भरती राबवली जात आहे.
कोणत्या पदांसाठी किती जागा?
आसाम रायफल्सच्या या भरतीत गट ‘क’ संवर्गातील एकूण ३५४ पदे भरली जाणार आहेत. त्यामध्ये सर्वाधिक १२४ जागा वॉरंट ऑफिसर (सायफर) पदासाठी आहेत. याशिवाय रायफलमन (इलेक्ट्रिकल फिटर सिग्नल) ३२, रायफलमन (आर्मरर) २९, रायफलमन (मेसन) २९ आणि रायफलमन (इलेक्ट्रिशियन मेकॅनिक व्हेईकल) २२ पदांचा समावेश आहे.
तसेच लाइनमन फील्ड, इंजिनिअर इक्विपमेंट मेकॅनिक, रिकव्हरी व्हेईकल मेकॅनिक, मेटलस्मिथ, वेल्डर, ड्राफ्ट्समन, फिजिओथेरपिस्ट आणि ऑपरेशन थिएटर टेक्निशियन अशा विविध ट्रेडमधील पदेही भरली जाणार आहेत.
शैक्षणिक पात्रता आणि वयोमर्यादा
या भरतीसाठी अर्ज करणारा उमेदवार भारतीय नागरिक असणे आवश्यक आहे. अधिकृत जाहिरातीनुसार, या भरतीतील सर्व पदे पुरुष उमेदवारांसाठी आहेत. तसेच उमेदवाराकडे संबंधित राज्य किंवा केंद्रशासित प्रदेशाचे वैध अधिवास प्रमाणपत्र किंवा कायम रहिवासी प्रमाणपत्र (PRC) असणे गरजेचे आहे.
पदांनुसार शैक्षणिक पात्रता वेगवेगळी निश्चित करण्यात आली आहे. काही पदांसाठी दहावी उत्तीर्ण असणे आवश्यक आहे, तर तांत्रिक पदांसाठी दहावीसोबत संबंधित ट्रेडमधील आयटीआय प्रमाणपत्राची अट आहे. सायफर पदासाठी बारावी उत्तीर्ण, रेडिओ-टेलिव्हिजन किंवा इलेक्ट्रॉनिक्समधील दोन वर्षांचे आयटीआय प्रमाणपत्र तसेच इलेक्ट्रॉनिक्स किंवा आयटीमधील पदवी आवश्यक असल्याचे नमूद करण्यात आले आहे.
बहुतांश पदांसाठी उमेदवारांचे वय १८ ते २३ वर्षे असावे. मात्र, सायफर आणि ड्राफ्ट्समनसारख्या काही पदांसाठी कमाल वयोमर्यादा २५ वर्षे आहे. वयाची गणना १ जुलै २०२६ या तारखेनुसार केली जाणार आहे. एससी आणि एसटी प्रवर्गातील उमेदवारांना पाच वर्षे, तर ओबीसी उमेदवारांना तीन वर्षांची वयोमर्यादेत सवलत मिळेल.
अर्ज शुल्क किती?
गट ‘क’ पदांसाठी अर्ज करणाऱ्या उमेदवारांना १०० रुपये शुल्क भरावे लागणार आहे. मात्र, अनुसूचित जाती, अनुसूचित जमाती आणि माजी सैनिक उमेदवारांना अर्ज शुल्कातून सूट देण्यात आली आहे. शुल्क ऑनलाइन किंवा अधिसूचनेत नमूद केलेल्या एसबीआय बँक काउंटरच्या माध्यमातून भरता येईल.
अशी होणार उमेदवारांची निवड
भरती प्रक्रियेत उमेदवारांना सर्वप्रथम शारीरिक मानक चाचणी (PST) आणि शारीरिक कार्यक्षमता चाचणी (PET) द्यावी लागेल. त्यानंतर पात्र उमेदवारांची संगणक आधारित परीक्षा (CBT) घेतली जाईल. सामान्य प्रवर्गातील पुरुष उमेदवारांना पाच किलोमीटरचे अंतर २४ मिनिटांत पूर्ण करणे आवश्यक आहे.
सीबीटी परीक्षा १०० गुणांची असेल. सामान्य आणि आर्थिकदृष्ट्या दुर्बल घटकांतील उमेदवारांना किमान ३५ टक्के गुण, तर एससी, एसटी आणि ओबीसी उमेदवारांना ३३ टक्के गुण मिळवणे आवश्यक आहे. यानंतर ट्रेडनुसार कौशल्य चाचणी, कागदपत्रांची पडताळणी आणि वैद्यकीय तपासणी होईल. अंतिम निवड गुणवत्ता यादी आणि उपलब्ध पदांच्या संख्येनुसार केली जाणार आहे.
अर्ज कुठे आणि कसा कराल?
इच्छुक उमेदवारांनी आसाम रायफल्सच्या अधिकृत वेबसाइटला भेट देऊन ‘ONLINE APPLICATION’ या पर्यायावर क्लिक करावे. त्यानंतर अर्जामध्ये नाव, जन्मतारीख, शैक्षणिक पात्रता, पत्ता, मोबाईल क्रमांक आणि ई-मेल आयडी यांसह आवश्यक माहिती भरावी. संबंधित पद आणि प्रवर्ग निवडल्यानंतर लागू असलेले अर्ज शुल्क भरावे.
शुल्क भरल्यानंतर पेमेंट पावती किंवा चलनाची प्रत अपलोड करून अर्ज सबमिट करावा. अर्जाची प्रक्रिया पूर्ण झाल्यानंतर त्याची प्रिंट काढून स्वतःजवळ ठेवावी.
अर्ज करण्याची अंतिम तारीख : १४ डिसेंबर २०२६
उमेदवारांनी अर्ज करण्यापूर्वी आसाम रायफल्सच्या अधिकृत वेबसाइटवरील भरती अधिसूचना काळजीपूर्वक वाचावी आणि पदनिहाय पात्रता, शारीरिक निकष तसेच आवश्यक कागदपत्रांची खात्री करूनच अर्ज करावा.















Discussion about this post