ग्रामपंचायतीत प्रशासकीय भूकंप! जळगाव जामोदमधील २ ग्रामसेवक तडकाफडकी निलंबित

बुलढाणा : जळगाव जामोद तालुक्यातील दादुलगाव ग्रामपंचायतीच्या कथित अनियमित कारभाराप्रकरणी दोन तत्कालीन ग्रामसेवकांवर निलंबनाची कारवाई करण्यात आली आहे. ग्रामपंचायतीचे अधिकृत अभिलेख व्यवस्थित न ठेवणे, माहिती अधिकारांतर्गत मागणी करूनही आवश्यक कागदपत्रे व माहिती उपलब्ध करून न देणे तसेच शासकीय कर्तव्यात कसूर केल्याचा ठपका ठेवत अनिल सखाराम अंबडकार आणि विजय शंकर ढगे यांना निलंबित करण्यात आले आहे. जळगाव जामोद पंचायत समितीच्या गटविकास अधिकाऱ्यांनी ही कारवाई केली आहे.

दादुलगाव ग्रामपंचायतीच्या २०१७ पासूनच्या कारभाराबाबत ग्रामस्थांकडून सातत्याने तक्रारी करण्यात येत होत्या. ग्रामपंचायतीचे अधिकृत दप्तर व अभिलेख अद्ययावत ठेवले जात नसल्याचा, तसेच माहिती अधिकार कायद्यांतर्गत अर्ज करूनही नागरिकांना आवश्यक कागदपत्रे आणि माहिती उपलब्ध करून दिली जात नसल्याचा आरोप करण्यात आला होता. या प्रकारामुळे ग्रामपंचायतीच्या कारभारातील पारदर्शकतेवर प्रश्नचिन्ह निर्माण झाले होते.

या कथित अनियमिततेविरोधात दादुलगावातील तरुणांनी आक्रमक भूमिका घेत प्रशासनाचे लक्ष वेधले होते. मानेगाव ते बुलढाणा जिल्हाधिकारी कार्यालयापर्यंत तब्बल ८० किलोमीटरचा पायी मशाल मोर्चा काढण्यात आला होता. ग्रामपंचायतीच्या कारभाराची सखोल चौकशी करून दोषींवर कठोर कारवाई करण्याची मागणी या आंदोलनातून करण्यात आली होती.

खुलासा असमाधानकारक ठरल्यानंतर निलंबन

या प्रकरणाची जिल्हा परिषदेच्या मुख्य कार्यकारी अधिकाऱ्यांनी दखल घेत संबंधित ग्रामसेवकांना कारणे दाखवा नोटीस बजावली होती. संबंधितांकडून प्राप्त झालेला खुलासा समाधानकारक नसल्याचे प्रशासनाच्या निदर्शनास आल्यानंतर अखेर दोन्ही तत्कालीन ग्रामसेवकांवर निलंबनाची कारवाई करण्यात आली.

निलंबन काळात मुख्यालय सोडण्यास मनाई

निलंबित करण्यात आलेल्या दोन्ही ग्रामसेवकांना निलंबनाच्या कालावधीत मुख्यालय सोडण्यास मनाई करण्यात आली आहे. सक्षम प्राधिकाऱ्याची पूर्वपरवानगी घेतल्याशिवाय त्यांना मुख्यालयाबाहेर जाता येणार नाही. तसेच निलंबन काळात खासगी व्यवसाय किंवा अन्य नोकरी करण्यावरही निर्बंध घालण्यात आले आहेत.

दरम्यान, ग्रामपंचायतीच्या कारभाराविरोधात तरुणांनी उभारलेल्या आंदोलनानंतर झालेल्या या कारवाईमुळे ग्रामस्थांमध्ये चर्चेला उधाण आले आहे. आता २०१७ पासूनच्या संपूर्ण कारभाराची सखोल चौकशी होणार का आणि या प्रकरणात आणखी कोणाची भूमिका समोर येणार, याकडे ग्रामस्थांचे लक्ष लागले आहे.