मुंबई । दिवाळीचा सण आणि छठपूजेच्या पार्श्वभूमीवर गावी जाणाऱ्या प्रवाशांची मुंबईतील रेल्वे स्थानकांवर मोठी गर्दी होत आहे. या गर्दीवर नियंत्रण मिळवण्यासाठी मध्य रेल्वेने महत्त्वाचा निर्णय घेतला आहे. मुंबईतील पाच प्रमुख रेल्वे स्थानकांवर प्लॅटफॉर्म तिकीट विक्री तात्पुरती बंद करण्यात आली आहे. त्यामुळे प्रवाशांना सोडण्यासाठी किंवा घेण्यासाठी रेल्वे स्थानकावर जाण्याचा विचार करणाऱ्यांना याची दखल घ्यावी लागणार आहे.
मुंबईतील ५ स्थानकांवर प्लॅटफॉर्म तिकीट बंद
मध्य रेल्वेने घेतलेल्या निर्णयानुसार, छत्रपती शिवाजी महाराज टर्मिनस (CSMT), दादर, लोकमान्य टिळक टर्मिनस (LTT), ठाणे आणि कल्याण या पाच प्रमुख स्थानकांवर प्लॅटफॉर्म तिकीट विक्री बंद राहणार आहे. ५ नोव्हेंबरपासून १५ नोव्हेंबर २०२६ पर्यंत हे निर्बंध लागू असतील. या कालावधीत केवळ वैध रेल्वे प्रवासाचे तिकीट असलेल्या प्रवाशांनाच प्लॅटफॉर्मवर प्रवेश दिला जाणार आहे. त्यामुळे प्रवाशांसोबत येणाऱ्या नातेवाईकांना प्लॅटफॉर्मवर जाण्यासाठी अडचणींचा सामना करावा लागू शकतो.
या प्रवाशांच्या नातेवाईकांना मिळणार सूट
रेल्वेने प्लॅटफॉर्मवरील गर्दी कमी करण्यासाठी हा निर्णय घेतला असला तरी काही विशेष परिस्थितींमध्ये नातेवाईकांना प्रवेशाची सवलत देण्यात येणार आहे. यामध्ये ज्येष्ठ नागरिकांना सोडण्यासाठी किंवा घेण्यासाठी येणारे नातेवाईक, आजारी प्रवाशांच्या मदतीसाठी येणारे व्यक्ती, लहान मुलांसोबत प्रवास करणाऱ्या प्रवाशांचे नातेवाईक तसेच महिला प्रवाशांसोबत येणाऱ्या नातेवाईकांचा समावेश आहे. मात्र, अशा प्रवाशांना प्रवेश देण्याबाबत रेल्वे प्रशासनाच्या नियमानुसार निर्णय घेतला जाणार आहे.
गर्दी आणि संभाव्य दुर्घटना टाळण्यासाठी निर्णय
दिवाळी आणि छठपूजेच्या काळात मुंबईतून उत्तर भारत, बिहार आणि पूर्व उत्तर प्रदेशच्या दिशेने जाणाऱ्या रेल्वे गाड्यांना मोठी गर्दी असते. सणासाठी गावी जाणाऱ्या प्रवाशांची संख्या वाढल्याने स्थानकांवरील गर्दीही नियंत्रणाबाहेर जाण्याची शक्यता असते.
अशा परिस्थितीत प्लॅटफॉर्मवर अनावश्यक गर्दी होऊ नये, तसेच चेंगराचेंगरीसारख्या संभाव्य दुर्घटना टाळता याव्यात, यासाठी मध्य रेल्वेने हा निर्णय घेतला आहे. प्रवाशांनी आपल्या गाडीच्या वेळेनुसारच स्थानकावर पोहोचावे आणि रेल्वे प्रशासनाच्या नियमांचे पालन करावे, असे आवाहन करण्यात आले आहे.
Discussion about this post