मुंबई : महाराष्ट्र विधान परिषदेच्या पदवीधर आणि शिक्षक मतदारसंघांच्या निवडणुकीची रणधुमाळी सुरू झाली असून, काँग्रेसने आपल्या तीन उमेदवारांची नावे जाहीर केली आहेत. नागपूर पदवीधर मतदारसंघातून विद्यमान आमदार अभिजीत वंजारी, पुणे शिक्षक मतदारसंघातून जयंत आसगावकर आणि अमरावती शिक्षक मतदारसंघातून प्रा. अदिती पोहरे यांना काँग्रेसने उमेदवारी दिली आहे.
विधान परिषदेच्या पाच जागांसाठी २३ ऑक्टोबर रोजी मतदान होणार आहे. यामध्ये तीन पदवीधर आणि दोन शिक्षक मतदारसंघांचा समावेश आहे. उमेदवारी अर्ज दाखल करण्याची अंतिम तारीख ६ ऑक्टोबर असून, ७ ऑक्टोबरला अर्जांची छाननी आणि ९ ऑक्टोबरला अर्ज मागे घेण्याची अंतिम मुदत आहे. मतदानानंतर २७ ऑक्टोबरला मतमोजणी होणार आहे.
नागपुरातून अभिजीत वंजारींना पुन्हा संधी
नागपूर पदवीधर मतदारसंघातून काँग्रेसने विद्यमान आमदार अभिजीत वंजारी यांच्यावर पुन्हा विश्वास दाखवला आहे. त्यामुळे वंजारी पुन्हा एकदा निवडणुकीच्या मैदानात उतरणार आहेत.
पुणे शिक्षक मतदारसंघातून जयंत आसगावकर
पुणे शिक्षक मतदारसंघातून जयंत आसगावकर यांना काँग्रेसने उमेदवारी जाहीर केली आहे. या मतदारसंघातील विद्यमान सदस्यांचा कार्यकाळ ६ डिसेंबर २०२६ रोजी संपणार आहे.
अमरावतीत अदिती पोहरे यांना उमेदवारी
अमरावती विभाग शिक्षक मतदारसंघातून प्रा. अदिती पोहरे यांना काँग्रेसने उमेदवारी दिली आहे. पोहरे यांनी नुकताच काँग्रेसमध्ये प्रवेश केला असून त्यानंतर पक्षाने त्यांचे नाव जाहीर केले आहे.
दरम्यान, पाचही मतदारसंघांमध्ये निवडणुकीची तयारी सुरू झाली असून विविध पक्षांकडून उमेदवार निश्चित करण्याची प्रक्रिया सुरू आहे. काँग्रेसने तीन मतदारसंघांतील उमेदवार जाहीर केल्यानंतर आता इतर पक्षांच्या उमेदवारांकडेही राजकीय वर्तुळाचे लक्ष लागले आहे.
Discussion about this post