चोपडा । गणपती विसर्जन मिरवणुकीला जाण्यास वडिलांनी नकार दिल्याने नाराज झालेल्या १२ वर्षीय शाळकरी मुलाने टोकाचे पाऊल उचलल्याची दुर्दैवी घटना चोपडा तालुक्यातील घुमावल येथे घडली. या घटनेमुळे परिसरात हळहळ व्यक्त होत असून, कुटुंबावर दुःखाचा डोंगर कोसळला आहे.
मिळालेल्या माहितीनुसार, घुमावल येथील ६ वीच्या वर्गात शिकणाऱ्या १२ वर्षीय मुलाने गणपती विसर्जन मिरवणुकीला जाण्यासाठी वडिलांकडे आग्रह केला होता. मात्र, वडिलांनी त्याला मिरवणुकीत जाण्यास नकार दिला. त्यानंतर मुलगा नाराज झाला.
काही वेळाने त्याने घरातील तिसऱ्या मजल्यावर जाऊन आत्महानीचे पाऊल उचलले. ही बाब कुटुंबीयांच्या लक्षात येताच त्यांनी तातडीने मदत केली. मात्र, या घटनेत मुलाचा मृत्यू झाला.
दरम्यान, संबंधित मुलगा मोबाईलवर सातत्याने ‘रील्स’ पाहत असल्याची प्राथमिक माहिती पालकांनी पोलिसांना दिली आहे. मात्र, या घटनेमागील नेमके कारण स्पष्ट झालेले नाही. या प्रकरणी चोपडा ग्रामीण पोलीस ठाण्यात अकस्मात मृत्यूची नोंद क्रमांक ४८/२०२६ करण्यात आली आहे. घटनेचा पुढील तपास ग्रामीण पोलीस करीत आहेत.
या घटनेमुळे घुमावल परिसरात शोककळा पसरली असून, अल्पवयीन मुलांच्या मोबाईल वापरासह त्यांच्या भावनिक अवस्थेकडे पालकांनी गांभीर्याने लक्ष देण्याची गरज अधोरेखित झाली आहे.
Discussion about this post