रोजगारासाठी आले, पण काळाने गाठलं! ! शिरपूर-चोपडा मार्गावर चौघांचा मृत्यू

धुळे । शिरपूर-चोपडा मार्गावरील सावेर गावाच्या शिवारात भरधाव ट्रकने मोटारसायकलला समोरून जोरदार धडक दिल्याने भीषण अपघात झाला. या दुर्घटनेत मध्य प्रदेशातील चौघांचा मृत्यू झाला. अपघातानंतर ट्रकचालक घटनास्थळावरून पसार झाला असून त्याच्याविरुद्ध थाळनेर पोलिस ठाण्यात गुन्हा दाखल करण्यात आला आहे.

मृतांमध्ये लुमरीया लालसिंग भिलाला (२५), इसराम कालू भिलाला (४८) दोन्ही रा. बुद्रा, ता. राजपूर, जि. बडवानी तसेच सुरेश रमेश कनासे (२६) आणि महेश लालसिंग कनासे (३१) दोन्ही रा. बालिया, ता. सनावद, जि. खरगोन, मध्य प्रदेश यांचा समावेश आहे.

एकाच दुचाकीवरून चौघे जात होते

मिळालेल्या माहितीनुसार,मृत चौघेही मध्यप्रदेशातील रहिवासी असून रोजगारासाठी शिरपूर तालुक्यात आल्याची प्राथमिक माहिती आहे. इसराम भिलाला हे तिघांना सोबत घेऊन एमपी-१०-झेडएन-३२२६ क्रमांकाच्या मोटारसायकलवरून शिरपूरहून चोपड्याकडे जात होते. १३ सप्टेंबर रोजी सायंकाळी साडेसहा वाजेच्या सुमारास सावेर गावाच्या शिवारात समोरून भरधाव वेगाने येणाऱ्या एचआर-५५-एटी-१३५५ क्रमांकाच्या मालमोटारीने त्यांच्या दुचाकीला जोरदार धडक दिली.धडक एवढी भीषण होती की, मोटारसायकलवरील चौघांनाही गंभीर दुखापत झाली. अपघातानंतर मालमोटार चालकाने घटनास्थळावरून पलायन केले.अपघाताची माहिती मिळताच स्थानिक नागरिक आणि पोलिसांनी मदतकार्य सुरू केले. गंभीर जखमींना तातडीने शिरपूर तसेच धुळे येथील रुग्णालयात उपचारासाठी दाखल करण्यात आले. मात्र उपचार सुरू असताना चौघांचाही मृत्यू झाला.

फरार चालकाविरुद्ध गुन्हा दाखल

या प्रकरणी पन्नालाल कालूराम सिसोदिया (रा. बुद्रा, ता. राजपूर, जि. बडवानी) यांनी १६ सप्टेंबर रोजी रात्री उशिरा थाळनेर पोलिस ठाण्यात तक्रार दाखल केली. त्यांच्या तक्रारीवरून अज्ञात ट्रक चालकाविरुद्ध गुन्हा दाखल करण्यात आला आहे.

पोलिसांकडून तपास सुरू

घटनेची माहिती मिळताच शिरपूर विभागाचे उपविभागीय पोलिस अधिकारी सुधीर पाटील, थाळनेर पोलिस ठाण्याचे अधिकारी, पोलिस उपनिरीक्षक समाधान भाटेवाल, पोलिस उपनिरीक्षक हर्षल पाटील यांच्यासह पोलिस पथकाने घटनास्थळी भेट देऊन पंचनामा केला. अपघातग्रस्त वाहनांची पाहणी करून पुढील तपास सुरू करण्यात आला आहे.

दरम्यान, या अपघातामुळे शिरपूर-चोपडा मार्गावरील वाहतुकीवर काही काळ परिणाम झाला होता. चौघेही मध्य प्रदेशातील रहिवासी असल्याने त्यांच्या मृत्यूची बातमी समजताच कुटुंबीयांवर दुःखाचा डोंगर कोसळला. अपघातास कारणीभूत ठरलेल्या फरार मालमोटार चालकाचा पोलिसांकडून शोध सुरू आहे.