जळगाव । चोपडा तालुक्यातील देवझिरी गाव परिसरात तुरीच्या पिकाचा आडोसा घेत गांजाची लागवड करण्यात आल्याचा प्रकार समोर आला आहे. अडावद पोलिसांनी शेतशिवारात छापा टाकत गांजाची तब्बल १७५ झाडे जप्त केली. या कारवाईनंतर देवसिंह बरेला याला पोलिसांनी ताब्यात घेतले आहे.
देवझिरी गावालगतच्या शेतात तुरीचे पीक घेण्यात आले होते. मात्र, या पिकामध्ये गांजाची झाडेही लावण्यात आल्याची माहिती पोलिसांना मिळाली होती. माहितीची खातरजमा केल्यानंतर पोलिस पथकाने संबंधित शेतात जाऊन पाहणी केली. यावेळी तुरीच्या पिकामध्ये मोठ्या प्रमाणावर गांजाची झाडे आढळून आली.
पोलिसांनी घटनास्थळी पंचनामा करत गांजाची १७५ झाडे ताब्यात घेतली. या कारवाईत देवसिंह बरेला याला चौकशीसाठी ताब्यात घेण्यात आले असून, प्रकरणाचा पुढील तपास सुरू आहे.
डीवायएसपी सुनील पाटील आणि अडावद पोलिस ठाण्याचे प्रभारी एपीआय प्रशांत कंधारे यांच्या मार्गदर्शनाखाली ही कारवाई करण्यात आली. विशेष म्हणजे, ज्या शेतशिवारात ही लागवड आढळून आली ते ठिकाण मध्य प्रदेशच्या सीमेच्या जवळ आहे.
दरम्यान, जप्त करण्यात आलेल्या गांजाच्या झाडांचे वजन आणि बाजारमूल्य निश्चित करण्याची प्रक्रिया सुरू आहे. तसेच गांजाची लागवड किती क्षेत्रावर करण्यात आली होती, हा प्रकार किती दिवसांपासून सुरू होता आणि यामध्ये आणखी कोणी सहभागी आहे का, या सर्व बाबींचा तपास अडावद पोलिसांकडून केला जात आहे.
Discussion about this post