जळगाव । जळगाव शहरातील वर्दळीच्या समजल्या जाणाऱ्या ढोर बाजार परिसरातील ‘मातोश्री इलेक्ट्रिक’ दुकानाचे शटर वाकवून आणि कुलूप तोडून लाखोंचा माल लांबविणाऱ्या चोरट्यांच्या मुसक्या एमआयडीसी पोलिसांनी अवघ्या काही तासांत आवळल्या आहेत. पोलिसांनी या गुन्ह्यातील तीन्ही आरोपींना बेड्या ठोकल्या असून, त्यांच्याकडून तांब्याची तार व गुन्ह्यात वापरलेली मोटारसायकल असा एकूण ९० हजार रुपयांचा मुद्देमाल हस्तगत करण्यात आला आहे.
अशी केली होती हातचलाखी
पोलिसांकडून मिळालेल्या माहितीनुसार, गत ३ सप्टेंबर रोजी रात्री साडेआठ ते ४ सप्टेंबर रोजी सकाळी साडेआठ वाजेच्या सुमारास ढोर बाजारातील मातोश्री इलेक्ट्रिक दुकानाला अज्ञात चोरांनी लक्ष केले. दुकान बंद असताना चोरट्यांनी दुकानाचे शटर उचकटून आणि कुलूप तोडून आत प्रवेश केला. त्यानंतर दुकानातील तब्बल ४० किलो तांब्याची नवीन व जुनी तार आणि मोटार व लूम रिपेअरिंगचे साहित्य असा माल लंपास केला होता. याप्रकरणी दुकानदाराच्या फिर्यादीवरून एमआयडीसी पोलीस ठाण्यात भारतीय न्याय संहितेच्या कलमांन्वये गुन्हा दाखल करण्यात आला होता.
पोलिसांची चक्रे वेगाने फिरली; सीसीटीव्ही आणि तंत्रज्ञानामुळे आरोपी जाळ्यात
गुन्ह्याचे गांभीर्य लक्षात घेत पोलीस अधीक्षक श्री. श्रीकांत धिवरे आणि एमआयडीसी पोलीस ठाण्याचे प्रभारी अधिकारी तथा पोलीस निरीक्षक श्री. बबन आव्हाड यांनी तातडीने तपासाची सूत्रे हलवली. पोलीस उपनिरीक्षक चंद्रकांत पुंडलीक धनके यांच्या मार्गदर्शनाखाली एका विशेष पथकाने घटनास्थळाची पाहणी करत तांत्रिक पुरावे आणि सीसीटीव्ही फुटेजच्या आधारे संशयितांचा माग काढला.
या तपासात संशयितांची नावे निष्पन्न झाली आणि पोलिसांनी हर्षल गोपाल परदेशी (वय २२, रा. सुप्रीम कॉलनी, जळगाव), कमलेश सुरेश पवार (वय २१, रा. कुसुंबा, ता. व जि. जळगाव), रितेश निवृत्ती साळुंखे (वय २१, रा. कुसुंबा, ता. व जि. जळगाव) या तिघांना ताब्यात घेतलं
पोलिसी खाक्या दाखवताच या तिघांनी गुन्ह्याची कबुली दिली. पोलिसांनी त्यांच्याकडून ६० हजार रुपये किमतीची ४० किलो नवीन व जुनी तांब्याची तार आणि गुन्ह्यात वापरलेली ३० हजार रुपये किमतीची ‘हिरो होंडा स्प्लेंडर’ मोटारसायकल असा एकूण ९० हजार रुपयांचा मुद्देमाल यशस्वीरित्या जप्त केला आहे.
Discussion about this post