नशिराबादच्या कुख्यात गुंडावर एमपीडीएची कारवाई; वर्षभरासाठी येरवडा कारागृहात रवानगी

जळगाव । नशिराबाद परिसरात वारंवार दहशत निर्माण करणाऱ्या कुख्यात गुंडाविरुद्ध पोलिसांनी मोठी कारवाई केली आहे. शोएब शेख गुलाम नबी ऊर्फ ‘शोएब बिल्डर’ (वय ३५, रा. ख्वाजा नगर, नशिराबाद) याच्यावर महाराष्ट्र झोपडपट्टी दादा प्रतिबंधक कायद्यानुसार (एमपीडीए) कारवाई करण्यात आली आहे. जिल्हादंडाधिकाऱ्यांच्या आदेशानंतर त्याला एक वर्षासाठी स्थानबद्ध करून पुणे येथील येरवडा मध्यवर्ती कारागृहात पाठविण्यात आले.

शोएब बिल्डरविरुद्ध नशिराबाद पोलिस ठाण्यात गंभीर स्वरूपाचे अनेक गुन्हे दाखल आहेत. खुनाचा प्रयत्न, चोरी, रस्त्यात अडवून मारहाण करणे, शस्त्रांचा वापर करून हल्ला करणे तसेच हद्दपारीच्या आदेशाचे उल्लंघन केल्याप्रकरणी त्याच्यावर गुन्हे नोंदविण्यात आले आहेत. या प्रकरणांमुळे परिसरात त्याची दहशत निर्माण झाली होती.

पोलिसांकडून यापूर्वी त्याच्यावर विविध प्रतिबंधात्मक कारवाया करण्यात आल्या होत्या. तसेच हद्दपारीची कारवाईही झाली होती. मात्र, त्यानंतरही त्याच्या गुन्हेगारी कारवायांना आळा बसला नाही. त्यामुळे त्याच्याविरुद्ध कठोर प्रतिबंधात्मक कारवाई करण्याचा निर्णय पोलिसांनी घेतला.

नशिराबाद पोलिस ठाण्याच्या सहाय्यक पोलिस निरीक्षक योगिता एम. नारखेडे यांनी शोएब बिल्डरच्या गुन्हेगारी पार्श्वभूमीचा आढावा घेत त्याच्याविरुद्ध एमपीडीएअंतर्गत स्थानबद्धतेचा प्रस्ताव तयार केला. हा प्रस्ताव वरिष्ठ अधिकाऱ्यांच्या माध्यमातून जिल्हादंडाधिकाऱ्यांकडे सादर करण्यात आला.

प्रस्तावातील कागदपत्रे आणि उपलब्ध गुन्हेगारी नोंदींची छाननी केल्यानंतर जिल्हादंडाधिकाऱ्यांनी शोएब बिल्डर याच्यावर ४ सप्टेंबर रोजी एक वर्षाच्या स्थानबद्धतेचे आदेश जारी केले. आदेश प्राप्त होताच नशिराबाद पोलिसांनी त्याला ताब्यात घेतले. त्यानंतर कायदेशीर प्रक्रिया पूर्ण करून त्याची रवानगी थेट येरवडा मध्यवर्ती कारागृह, पुणे येथे करण्यात आली.

शोएबविरुद्ध खुनाचा प्रयत्न, दोन जबरी चोरीचे गुन्हे, रस्ता अडवून घातक शस्त्राने गंभीर मारहाण आणि हद्दपारीच्या आदेशाचे उल्लंघन असे गुन्हे दाखल असल्याची माहिती पोलिसांनी दिली.

ही कारवाई पोलिस अधीक्षक श्रीकांत धिवरे, अपर पोलिस अधीक्षक संदीप गावित आणि उपविभागीय पोलिस अधिकारी केदार बारबोले यांच्या मार्गदर्शनाखाली करण्यात आली. सहाय्यक पोलिस निरीक्षक योगिता नारखेडे, पोलिस उपनिरीक्षक प्रिया दातीर, पोलिस अंमलदार गुणवंत देशमुख, प्रशांत विरणारे, भरत बाविस्कर, पंकज सोनवणे, प्रवीण लोहार तसेच स्थानिक गुन्हे शाखेचे सहाय्यक फौजदार सुनील दामोदरे यांच्या पथकाने कारवाईची अंमलबजावणी केली. पोलिसांच्या या कारवाईमुळे नशिराबाद परिसरातील गुन्हेगारी प्रवृत्तीच्या व्यक्तींमध्ये खळबळ उडाली असून, कायदा व सुव्यवस्था अबाधित ठेवण्यासाठी पोलिसांकडून कठोर पावले उचलली जात असल्याचे या कारवाईतून स्पष्ट झाले आहे.